İranın Ali dini lideri Əli Xamenei ABŞ-ın İsrail-İran qarşıdurmalarını dayandırmaq üçün atəşkəs elan etməsindən sonra iyunun 26-da ictimaiyyətə ilk dəfə bəyanat verib.

O, İranın İsrail üzərində qələbə qazandığını bildirib.

Xamenei İran xalqına rəsmi “X” hesabında yayımlanan televiziya müraciətində deyib: “Bütün o hay-küyə, bütün o iddialara baxmayaraq, Sionist rejim, İslam Respublikasının zərbələri altında demək olar ki, çökdü və məhv oldu”.

Xamenei İsraillə münaqişədə qələbə münasibətilə İran xalqını təbrik edib.

O, həmçinin ABŞ-ı İranın nüvə obyektlərinə hücumlarına görə tənqid edib və İranın ABŞ-a heç vaxt təslim olmayacağını vurğulayıb, ABŞ-ın İsraillə münaqişə zamanı etdiyi hücumlardan “heç nə əldə etmədiyini” söyləyib.

Dövlət mediası tərəfindən yayımlanan bəyanatda Xamenei ABŞ-ın “müharibəyə birbaşa qoşulduğunu, çünki müdaxilə etməməyin Sionist rejimin tamamilə məhv olmasına səbəb olacağına inandığını” qeyd edib.

İranın Ali dini lideri Əli Xamenei onu da deyib ki, Vaşinqton bu müharibədən heç nə əldə etmədi. İslam Respublikası qalib gəldi və əvəzində Amerikaya ağır bir zərbə vurdu, Tramp isə həqiqəti gizlətməyə çalışır.