"Həmas"ın yüksək vəzifəli rəsmisi ABŞ prezidenti Donald Trampın Qəzzada atəşkəsin təmin olunması ilə bağlı təklif etdiyi plana tezliklə cavab veriləcəyini bildirib.
Məhəmməd Nazzal ‘‘Əl-Cəzirə’’ telekanalına verdiyi müsahibədə qeyd edib ki, "Həmas" bir sıra qeyd-şərtlərə baxmayaraq bu planı ciddi şəkildə müzakirə edir.
O, həm daxili, həm də xarici məsləhətləşmələrin artıq başladığını bildirib.
Nazzal həmçinin qeyd edib ki, "Həmas"ın verəcəyi son cavab Fələstin xalqının maraqlarını və Fələstin məsələsinin strateji əsaslarını nəzərə alacaq.
Trampın planı
Ağ Ev sentyabrın 29-da Qəzzada dərhal atəşkəsin təmin olunması və təhlükəsizlik strukturlarının yenidən qurulmasını nəzərdə tutan bir plan təqdim edib.
Plana əsasən, Qəzza beynəlxalq monitorinq qurumu tərəfindən nəzarət olunan, silahsızlaşdırılmış zonaya çevriləcək və müvəqqəti inzibati mexanizmlə idarə olunacaq.
Plan həmçinin İsrail həbsxanalarında olan yüzlərlə fələstinli məhbusun azad edilməsini, bununla yanaşı, sənədin təsdiqindən sonra 72 saat ərzində "Həmas" tərəfindən saxlanılan bütün israilli əsirlərin azad olunmasını tələb edir.
Sənəddə hərbi əməliyyatların dayandırılması, Fələstin müqavimət hərəkatının tərksilah edilməsi və İsrail ordusunun Qəzzadan mərhələli şəkildə çıxarılması kimi əsas şərtlər yer alır.
İsrail ordusu 2023-cü ilin oktyabr ayından etibarən Qəzzayada genişmiqyaslı hərbi əməliyyatlara başlayıb. Bu hücumlar nəticəsində əksəriyyəti qadın və uşaqlar olmaqla 66 mindən çox fələstinli həyatını itirib. İsrail isə beynəlxalq ictimaiyyətin atəşkəs çağırışlarını rədd etməkdə davam edir.
Həlak olanların sayına, dağıdılmış evlərin xarabalıqları altında qaldığı ehtimal edilən təxminən 11.000 nəfər daxil edilmir. Ekspertlər isə faktiki ölüm sayının Qəzza rəsmilərinin açıqladığı rəqəmlərdən də yüksək ola biləcəyini bildirirlər.
Beynəlxalq Cinayət Məhkəməsi (BCM) İsrailin Baş naziri Benyamin Netanyahu və keçmiş müdafiə naziri Yoav Qallant barəsində Qəzzada hərbi və insanlığa qarşı cinayətlər törətmək ittihamı ilə həbs orderi çıxarıb.
Birləşmiş Millətlər Təşkilatı (BMT) İsrailin Qəzzada soyqırım törətdiyi qənaətinə gəlib. BMT və bir sıra insan haqları təşkilatları dəfələrlə xəbərdarlıq ediblər ki, bölgə artıq yaşamaq üçün yararsız hala düşüb. Bölgədə yaşanan ərzaq qıtlığı və xəstəliklər isə humanitar böhranı daha da dərinləşdirir.
Qeyd edək ki, rəsmi Vaşinqton uzun illərdir müttəfiqi olan İsrailə hər il 3,8 milyard dollar məbləğində hərbi yardım ayırır. 2023-cü ilin oktyabr ayından etibarən ABŞ İsrailin Qəzzadakı hərbi əməliyyatları və regionda apardığı digər müharibə fəaliyyətlərinə dəstək məqsədilə 22 milyard dollardan çox maliyyə vəsaiti ayırıb.
