Türkiyə prezidenti Rəcəp Tayyib Ərdoğan mayın 7-də paytaxt Ankarada Əlcəzair prezidenti Əbdülməcid Təbbun ilə görüş keçirib.

Dövlət başçısı görüşdən sonra təşkil edilən birgə mətbuat konfransında deyib: “Qəzza, İordan çayının qərb sahili və Livandakı İsrail təcavüzü bölgəmiz üçün əsl təhlükəsizlik probleminin mövcud hökumətin ekspansionist, hüquq və qayda tanımayan siyasəti olduğunu bir daha nümayiş etdirdi.

Türkiyə və Əlcəzair olaraq, bölgəmizin sülh və təhlükəsizliyini ciddi şəkildə təhdid edən zorakılıq dövrünün sona çatması ilə bağlı ortaq mövqeyimiz var. Əlcəzairlə dostluğumuzu və əməkdaşlığımızı hər iki tərəf üçün faydalı bir yanaşma əsasında bütün sahələrdə inkişaf etdirməyə davam edəcəyik”.

Əlcəzair prezidenti Əbdülməcid Təbbun da İsrailin bölgədəki hərəkətlərini pisləyib: “İsrail işğalının beynəlxalq hüququ pozmasını, qardaş Livana qarşı açıq hücumlarını və Qəzzadakı vəhşi hücumlarını kəskin şəkildə qınayırıq”.

Əməkdaşlığın gücləndirilməsi

Ərdoğan Təbbunu Prezident Administrasiyasında qarşılayıb. Liderlər daha sonra Yüksək Səviyyəli Strateji Əməkdaşlıq Şurasının iclasına həmsədrlik edib və ikitərəfli sazişlərin imzalama mərasimində iştirak ediblər.

Ərdoğan Ankaranın enerji, mədən sənayesi, nəqliyyat və kənd təsərrüfatı kimi strateji sektorlarda Əlcəzairlə əməkdaşlığı gücləndirmək əzmində olduğunu bildirib.

Dövlət başçısı iki ölkənin enerji təchizatı təhlükəsizliyi, xüsusilə təbii qaz məsələsində uzunmüddətli əməkdaşlığı dərinləşdirməyə davam etdiyini sözlərinə əlavə edib.

Təbbun isə Əlcəzair və Türkiyənin iqtisadi əlaqələri şaxələndirməyi və ortaq tarixi mirası qorumağı hədəflədiyini qeyd edib.