Türkiyənin ABŞ-dakı səfiri Sedat Önal yanvarın 7-də Vaşinqtonda senator Elissa Slotkin ilə görüşüb. Hər iki tərəf görüşün məhsuldar keçdiyini bildirib.

Türkiyənin Vaşinqtondakı səfirliyinin rəsmi “X” hesabında yayılan məlumata görə, görüş zamanı Türkiyə–ABŞ münasibətlərində qarşılıqlı maraq doğuran mövzular, ikitərəfli əməkdaşlıq imkanları, eləcə də mövcud regional və beynəlxalq proseslər müzakirə olunub. Bildirilib ki, tərəflər iki ölkə arasında dialoq və koordinasiyanın davam etdirilməsinin vacibliyini də vurğulayıblar.

Mətbuata qapalı keçirilən görüşün detalları ilə bağlı əlavə məlumat açıqlanmayıb.

Bu arada, Türkiyə Prezidenti Rəcəb Tayyib Ərdoğan ölkəsinin ABŞ-ın rəhbərlik etdiyi F-35 qırıcı təyyarə proqramına yenidən daxil edilməsi çağırışını bir daha səsləndirib. O, bildirib ki, bu addım Vaşinqtonla münasibətlərin güclənməsinə və NATO-nun təhlükəsizlik çərçivəsinin möhkəmləndirilməsinə töhfə verə bilər.

Ərdoğan “Bloomberg”ə verdiyi müsahibədə Türkiyənin ‘‘F-35 proqramı’’ndan çıxarılmasını “ədalətsiz” adlandırıb və Donald Trampın yenidən ABŞ prezidenti seçilməsinin münasibətlərin daha konstruktiv əsasda bərpası üçün fürsət yaratdığını qeyd edib.

Türkiyə lideri ‘‘F-35’’ təyyarələrinin alınmasını “vacib və zəruri” hesab etdiyini vurğulayıb. O, həmçinin uzun müddətdir davam edən “Halkbank” işi və ABŞ-dan Türkiyəyə mayeləşdirilmiş təbii qazın (LNG) tədarükünün artırılması ilə bağlı danışıqların davam etdiyini bildirib.