Çin iki iqtisadi nəhəng arasında davam edən ticarət müharibəsi fonunda ABŞ-la "bərabər dialoqa" çağırıb. Bu, "Apple" şirkətinin Baş direktoru Tim Kukun ölkəyə səfəri zamanı baş verib.

Ötən həftə Pekin nadir torpaq elementləri ixracına hərtərəfli nəzarət elan etdi. Buna cavab olaraq ABŞ prezidenti Donald Tramp noyabrın 1-dən etibarən 100% tariflər tətbiq edəcəyini bəyan etdi. Bununla belə, Çinin dövlət başçısı Si Cinpinlə planlaşdırılan bir görüş bu gərginliyin azaldılması üçün fürsət verə bilər.

"Apple" üçün əsas bazar və istehsal mərkəzi olan Çinə müntəzəm səfər edən Kuk oktyabrın 16-da Çinin ticarət naziri Vanq Ventao ilə görüşüb. Rəsmi açıqlamaya görə, Vanq görüş zamanı Pekin və Vaşinqtonun “məsələlərə bərabər dialoq və məsləhətləşmələr yolu ilə həll yollarını axtarmalı” olduğunu vurğulayıb.

Vanq həmçinin "Apple" şirkətinin Çinə "artan sərmayə qoyuluşlarını" alqışlayıb. Ticarət Nazirliyindən verilən açıqlamaya görə, Kuk Çin və ABŞ arasında yaxşı iqtisadi əlaqələrin "böyük əhəmiyyət kəsb etdiyini" bildirib.

“Apple” şirkətinin baş icraçı direktoru Çinin baş ticarət məsləhətçisi olan Baş nazirin müavini He Lifeng ilə də görüşüb. "Xinhua" dövlət xəbər agentliyinin məlumatına görə, Kuk Tsinxua Universitetinin İqtisadiyyat və İdarəetmə Məktəbinin Məsləhət Şurasında deyib ki, Çin dünya ölkələri ilə qarşılıqlı faydalı əməkdaşlığı dərinləşdirməyə hazırdır.

"Blackstone" şirkətinin Baş direktoru Stiven A. Şvarsman da eyni vaxtda Pekində olub və xarici işlər naziri Vanq Yi ilə görüşüb. Rəsmi açıqlamaya görə, Vanq Yi Şvarzmana "Çin-ABŞ münasibətləri bu gün dünyanın ən mühüm ikitərəfli əlaqələridir" deyib.

"Əlaqələrin kəsilməsi və ayrılıq nə real, nə də ağlabatan variantdır və münaqişə hər iki tərəfə zərər verəcək", - o əlavə edib.

Açıqlamaya görə, Şvarsman iki tərəfin "anlaşılmazlıqları aradan qaldıracağına" ümid etdiyini bildirib.