Türkiyənin müxalifətdəki Cümhuriyyət Xalq Partiyasının 2023-cü ilin noyabrında keçirilən qurultayının nəticələri ləğv olunub. Məlumata görə, bununla bağlı Ankara Bölgə Ədalət Məhkəməsi qərar qəbul edib.
Qərara əsasən, sözügedən qurultayda seçilmiş Mərkəzi İcra Komitəsi (MYK), Partiya Məclisi (PM) və Yüksək İntizam Şurası (YDK) üzvləri məhkəmənin yekun qərarı qüvvəyə minənə qədər müvəqqəti olaraq vəzifələrindən kənarlaşdırılıb. Məhkəmənin yekun qərarı çıxarılana qədər partiya orqanlarının fəaliyyətini müvəqqəti olaraq Kamal Kılıçdaroğlu və 2023-cü ilin noyabr qurultayından əvvəl vəzifədə olan keçmiş rəhbərlik icra edəcək.
Bu addım Ankara 42-ci Birinci İnstansiya Hüquq Məhkəməsinin 24 oktyabr 2025-ci il tarixli qərarına qarşı edilən apelyasiya şikayətinə baxılmasından sonra atılıb. Ankara Bölgə Ədalət Məhkəməsi aşağı instansiya məhkəməsinin "işin mahiyyətinə baxılmadığı üçün qərar çıxarılmasına ehtiyac olmadığı" barədə verdiyi ilkin qərarı ləğv edərək, əsas iddia üzrə apelyasiya şikayətlərini qəbul edib. Bununla da sözügedən qurultay və qurultaydan sonra qəbul edilmiş bütün qərarlar ləğv olunub.
Beləliklə, qurultayda Cümhuriyyət Xalq Partiyasının sədri seçilən Özgür Özel vəzifəsindən kənarlaşdırılıb, onun qalib gəldiyi Kamal Kılıçdaroğlu isə partiya rəhbərliyinə bərpa edilib.
