Donald Tramp Cənubi Koreyanın ABŞ-ın nəzarətində olan sərmayələri üçün 350 milyard dollar ödəməsini və ixracatına tarifləri qəbul etməsini tələb edən yeni ticarət sazişini açıqlayıb.

Prezident Donald Tramp ABŞ və Cənubi Koreya arasında Cənubi Koreyanın ABŞ-a ixracına 15% rüsum tətbiq edən yeni ticarət razılaşmasının əldə edildiyini bildirib.

"ABŞ-ın Cənubi Koreya ilə tam və hərtərəfli ticarət sazişinə razılaşdığını elan etməkdən məmnunam", - o "Truth Social" sosial şəbəkəsində yazıb.

Tramp "Sazişin şərtlərinə görə, Cənubi Koreya Birləşmiş Ştatlara 350 milyard dollar məbləğində sərmayə ayıracaq, bu sərmayələr ABŞ-a məxsus olacaq, onun tərəfindən nəzarət ediləcək. Bundan başqa, Cənubi Koreya 100 milyard dollarlıq LNG və ya digər enerji resursları alacaq və investisiya məqsədləri üçün əhəmiyyətli məbləğdə pul ayırmağa razılaşıb" deyib.

Razılaşmanın bir hissəsi olaraq Tramp Cənubi Koreyanın öz bazarlarını ABŞ məhsulları, xüsusilə də avtomobil, yük maşınları və kənd təsərrüfatı məhsulları üçün tam açacağını bildirib. Bunun müqabilində Cənubi Koreyanın ABŞ-a ixracına 15% rüsum tətbiq olunacaq, ABŞ məhsulları isə Cənubi Koreyaya rüsumsuz daxil olacaq.

Qeyd edək ki, həftənin əvvəlində Tramp ölkəsinin Pakistanla da ticarət razılaşması əldə etdiyini və digər ölkələrlə danışıqların onun təyin etdiyi 1 avqust tarixinə qədər davam etdiyini açıqlamışdı.