Çinin ABŞ prezidenti Donald Trampın Çin məhsullarına tətbiq etdiyi rüsumlara cavab olaraq tətbiq etdiyi 84% tarif cümə axşamı günü iki qlobal iqtisadiyyat arasında artan ticarət müharibəsi fonunda qüvvəyə minib.
Trampın ilk tarif dalğasına cavab olaraq, Çin 34% adekvat tariflər elan etmiş və Trampın “geri addım atmasan, daha da artıracağam” xəbərdarlığını rədd etmişdi.
Tramp Çindən idxal edilən məhsullara tətbiq etdiyi tarifləri 104%-ə qaldırdıqdan sonra Pekin ABŞ məhsullarına 84% vergi ilə cavab verib. Donald Tramp çərşənbə günü tarifləri 125%-ə yüksəldib. Rəsmi Pekin digər əks tədbirlərlə yanaşı, 18 Amerika şirkətinə ticarət məhdudiyyətləri tətbiq edib. Çin ABŞ-ın tətbiq etdiyi tariflərin təsirini azaltmaq və ticarət razılaşmalarını möhkəmləndirmək üçün digər ölkələrlə əlaqələrini gücləndirir.
Pekin-Brüssel yaxınlaşması
Çin prezidenti Şi Cinpin gələn həftə Cənub-Şərqi Asiya ölkələrinə, o cümlədən Malayziyaya səfər edəcək.
Çin Ticarət Nazirliyinin yaydığı bəyanata görə, Çin və Avropa İttifaqı (Aİ) Ümumdünya Ticarət Təşkilatına (ÜTT) əsaslanan çoxtərəfli ticarət sistemini birgə qorumağa söz verib.
Çinin "Şinxua" xəbər agentliyinin cümə axşamı yaydığı məlumatda bildirilir ki, bu razılaşma Çinin ticarət naziri Vanq Ventao ilə Avropa Komissiyasının ticarət və iqtisadi təhlükəsizlik üzrə komissarı Maros Şefçoviç arasında keçirilən telekonfrans zamanı əldə olunub.
Tərəflər Çin-Aİ iqtisadi və ticarət əməkdaşlığının genişləndirilməsi və ABŞ-ın tətbiq etdiyi qondarma tariflərə cavablar da daxil olmaqla müxtəlif məsələləri müzakirə ediblər.
"Şinxua" agentliyinin məlumatına görə, Şefçoviç ABŞ-ın tariflərinin beynəlxalq ticarətə ciddi təsir etdiyini və Aİ-nin beynəlxalq ticarətin normal fəaliyyətini təmin etmək üçün Çin də daxil olmaqla digər ÜTT üzvləri ilə işləməyə hazır olduğunu bildirib.
