Türkiyə Prezidenti Rəcəb Tayyib Ərdoğan Antalya Diplomatiya Forumu 2026 çərçivəsində Azərbaycan Prezidenti İlham Əliyevlə görüş keçirib. Prezident R.T.Ərdoğanın qaldığı oteldə baş tutan görüş mətbuata qapalı keçirilib.
Bu barədə Türkiyə Prezident Administrasiyasının İctimaiyyətlə Əlaqələr İdarəsi tərəfindən məlumat verilib. Açıqlamada deyilir: “Tərəflər görüş zamanı Türkiyə–Azərbaycan ikitərəfli münasibətlərini, eləcə də regional və qlobal məsələləri müzakirə ediblər.”
Ölkə başçısı R.T.Ərdoğan Prezidenti İ.Əliyevlə görüşündə bildirib ki, İranda baş verən müharibənin mənfi təsirlərini region ölkələri kimi Türkiyə və Azərbaycan birlikdə yaşayır, prosesləri sağlam düşüncə və təmkinlə idarə edir və bu prosesin sülhlə nəticələnməsi üçün Türkiyənin səyləri davam edir.
Prezident R.T.Ərdoğan görüşdə Türkiyə ilə Azərbaycan arasında ticarət, enerji və müdafiə sənayesi sahələrində əməkdaşlığın dərinləşdirilməsi və münasibətlərin daha yüksək səviyyəyə qaldırılması istiqamətində qətiyyətli olduqlarını, atılacaq yeni addımlarla buna nail olunacağına inandıqlarını bildirib.
Prezident R.T.Ərdoğan görüş zamanı Türkiyənin Ermənistan ilə Azərbaycan arasında davamlı sülh istiqamətində atılan addımları məmnuniyyətlə qarşıladığını və bu prosesi dəstəkləməyə davam edəcəyini bildirib.
