Türkiyə dövləti qonşusu olan İrana qarşı istənilən xarici müdaxilənin həm bu ölkədə, həm də daha geniş regionda böhranları dərinləşdirəcəyi barədə xəbərdarlıq edib. Rəsmi Ankara İranın daxili problemlərinin dialoq və ölkənin öz sosial dinamikləri vasitəsilə həll olunmalı olduğunu bildirib.

Bu barədə, Ədalət və İnkişaf Partiyasının (AKP) sədr müavini və partiyanın sözçüsü Ömer Çelik yanvarın 12-də verdiyi açıqlamada bildirib. O, İranın dövlət institutlarında problemlərin olduğunu qeyd etsə də, rəsmi Ankaranın İranda xaos görmək istəmədiyini deyib.

Türkiyə Respublikası prezidenti Rəcəb Tayyip Ərdoğanın sədrliyi ilə keçirilən görüşdən sonra Ankarada partiyanın baş qərargahında təşkil olunan mətbuat konfransında çıxış edən Ö.Çelik deyib: “Qonşumuz İranda xaos arzulamırıq. Problemlərin həlli İran prezidenti cənab Məsud Pezeşkianın da ifadə etdiyi kimi, İran cəmiyyətinin öz daxili dinamikləri ilə baş verməli, İran dövlətinin öz milli iradəsi ilə həyata keçirilməlidir. İrana kənardan edilən müdaxilələr daha böyük böhranlara səbəb olur.”

Ömer Çelik bildirib ki, xüsusilə İsrail tərəfindən qızışdırılan müdaxilələr region boyunca daha böyük böhranlara və daha dərin sabitsizliyə yol aça bilər. Məsələnin danışıqlar, dialoq və daha geniş ünsiyyət yolu ilə həll olunmalı olduğunu vurğulayan Ö.Çelik deyib: “İsrail rəsmilərinin xüsusilə İrana yönəlik bəyanatlarına baxdıqda, bütün regionda daha böyük çətinliklər yaradacaq bir mövqe sərgiləməyə çalışdıqlarını görürük ki, bu, qəti şəkildə rədd edilməli olan bir məsələdir.”

Qeyd edək ki, İran hazırda 2022-ci ildən bəri ölkədə müşahidə olunan ən böyük etiraz aksiyalarına səhnə olur. ABŞ prezidenti Donald Trump İranda etirazçılara qarşı güc tətbiq ediləcəyi təqdirdə rəsmi Vaşinqtonun vəziyyətə müdaxilə edə biləcəyini bildirib və bu açıqlama böhranın daha da kəskinləşə biləcəyi ilə bağlı narahatlıqları artırıb.