Ermənistanın Baş naziri Nikol Paşinyan parlamentdə çıxış edərək ölkəsinin daxili və xarici siyasətinə dair qiymətləndirmələr aparıb.

Ermənistan Konstitusiyasında ediləcək dəyişikliklərə də toxunan N.Paşinyan yeni konstitusiyada 1990-cı il tarixli Müstəqillik Bəyannaməsinə istinadın olmaması gərəkdiyini vurğulayıb. Baş nazir çıxışında deyib: "Qarabağ hərəkatını davam etdirməmək, əksinə, sona çatdırmaq qərarı aldığımızı bəyan etdik. Ermənistan vətəndaşları da bu qərarı təsdiqlədi."

Bundan əlavə, N.Paşinyan ölkəsinin dəmir yolu xətlərinin Rusiyanın idarəsində olmasının bu xətlərin beynəlxalq şəbəkəyə inteqrasiyasını risk altına saldığını bildirib. O, rusiyalı tərəfdaşlarından öz haqlarını üçüncü bir ölkəyə dövr etmələrini xahiş edib. N.Paşinyan deyib: "Ermənistan dəmir yollarının Rusiyanın idarəetməsində olması səbəbindən beynəlxalq dəmir yolu şəbəkəsinə inteqrasiya olunmaqla bağlı tarixi imkanı itirmək riski ilə qarşı-qarşıyayıq. Rusiyalı tərəfdaşlarımızdan anlayış nümayiş etdirmələrini istəyirik. Onlardan öz haqlarını həm Ermənistan, həm də Rusiya baxımından məqbul sayılan üçüncü bir ölkəyə satmalarını xahiş edirik."

N.Paşinyan: "Ermənistan xalqı dövlətini, müstəqilliyini və suverenliyini mafiyaya təslim etməyəcək"

Baş nazir N.Paşinyan Rusiyanın Ermənistana qarşı tətbiq etdiyi ixracat məhdudiyyətlərinin Ermənistan müxalifətinin təşviqi və tələbi ilə tətbiq olunduğunu bildirib.

"Hamilərinin dəstəyi ilə Ermənistanda ictimai-iqtisadi böhran başlatmağı planlaşdırırlar. Bununla da xalqın hökumətə qarşı üsyan etməsini təmin etməyi hədəfləyirlər. Lakin bu plan boşa çıxacaq. Çünki Ermənistan xalqı dövlətini, müstəqilliyini və suverenliyini mafiyaya təslim etməyəcək", - deyə Baş nazir bildirib.