Vatikan dövlətinin başçısı Roma Papası XIV Leo işğal olunmuş İordan çayının qərb sahilində yaşayan Fələstin xalqına qarşı zorakılığa son qoyulmasına çağırıb.

“Vatican News” saytının məlumatına görə, Papa avqustun 16-da duadan sonra etdiyi çıxışında İordan çayının qərb sahilindəki fələstinlilərə qarşı İsrailin zorakılığı məsələsinə toxunub.

Papa İordan çayının qərb sahilindəki Fələstin xalqına qarşı ardıcıl törədilən zorakılıq aktlarına son qoyulmasına çağırıb.

Beynəlxalq ictimaiyyətə müraciət edən Papa onları "iki dövlətli həll" modeli və davamlı sülh istiqamətində irəliləyişin təmin edilməsinə çağırıb.

Birləşmiş Millətlər Təşkilatı avqustun 12-də verdiyi bəyanatda İordan çayının qərb sahilində məskunlaşan israillilərin törətdiyi və Fələstin torpaqlarının ələ keçirilməsini nəzərdə tutan zorakılığın görünməmiş həddə çatdığını qeyd edib.

BMT 2026-cı ilin əvvəlindən bəri təxminən 260 Fələstin icmasını hədəf alan 1 430-dan çox hücumun sənədləşdirildiyini və yarıya yaxını uşaq olmaqla 3 800 fələstinlinin evlərinin sökülməsi və məcburi köçürülmələr nəticəsində didərgin düşdüyünü bəyan edib.