Latviya hava məkanına daxil olan pilotsuz uçuş aparatı (PUA) NATO qırıcıları tərəfindən zərərsizləşdirilib.
Latviya Silahlı Qüvvələrinin sosial media hesabından verilən bəyanatda ölkənin hava məkanında təhlükə yarandığını bildirib. Xəbərdarlıq Avqşdauqava, Preyli, Rezekne və Balvi bələdiyyələri tərəfindən edilib. Müdafiə nazirliyi sakinləri şübhəli obyektlərə yaxınlaşmamağa, müşahidə edilən hər hansı təhlükə barədə dərhal aidiyyəti qurumlara məlumat verməyə çağırıb.
Bir qədər sonra təhlükə rejiminin ləğv edildiyi açıqlanıb. Ordunun yaydığı növbəti məlumatda vurğulanıb: "NATO qırıcıları hava məkanımıza daxil olan pilotsuz uçuş aparatını uğurla zərərsizləşdirib".
Açıqlamada zərərsizləşdirilən PUA-nın hansı ölkəyə məxsus olduğu barədə ətraflı məlumat verilməyib.
Qeyd edək ki, Finlandiya da təhlükəsizlik tədbirlərini gücləndirib. Rəsmi Helsinki ölkənin cənubunda, Rusiya sərhədinə yaxın ərazilərdə hava və dəniz nəqliyyatının hərəkətinə müvəqqəti məhdudiyyətlərin tətbiq edildiyini elan edib.
