BMT Təhlükəsizlik Şurası Suriya prezidenti Əhməd Şaraa və daxili işlər naziri Ənəs Xəttabın DEAŞ və Əl-Qaidə sanksiya siyahısından çıxarılması üçün qətnamə qəbul edib.
ABŞ tərəfindən hazırlanmış qətnamə 14 səslə qəbul edilib, Çin isə bitərəf qalıb.
ABŞ-ın BMT-dəki səfiri Mayk Valts qətnamənin qəbul edilməsini alqışlayıb.
Valts "Bu mətnin qəbul edilməsi ilə Şura Suriyanın yeni bir dövrə qədəm qoyduğunu qəbul edən güclü siyasi mesaj göndərir. Prezident Şaraa və daxili işlər naziri Xəttabın sanksiya siyahısından çıxarılması Suriya xalqına ən böyük şansı verməlidir" deyib.
Çinin BMT nümayəndəsi Fu Konq qətnamənin "bütün tərəflərin qanuni narahatlıqlarını həll etmədiyini" iddia edib.
ABŞ-a istinad edən Fu deyib: "Qətnaməni təqdim edən tərəf bütün üzvlərin fikirlərini tam nəzərə almadı və Şuranı əhəmiyyətli fikir ayrılıqlarına baxmayaraq hərəkətə keçməyə məcbur etdi. Bu, öz siyasi gündəliyini irəli sürmək cəhdidir. Çin Suriyada təhlükəsizliyi, sabitliyi və inkişafı erkən bir tarixdə təmin etmək üçün beynəlxalq ictimaiyyətlə konstruktiv rol oynamağa hazırdır".
Rusiyanın BMT-dəki nümayəndəsi Vasili Nebenzya isə deyib ki, bu qətnamə Təhlükəsizlik Şurasının Suriya Ərəb Respublikasının suverenliyinə, müstəqilliyinə, birliyinə və ərazi bütövlüyünə sadiqliyini bir daha təsdiqləyir. Biz bu fundamental prinsiplərə öz qaydalarına uyğun hərəkət etməyə və Suriyanın suveren ərazilərinin bir hissəsini, xüsusən də Qolan təpələrini işğal etməyə davam edən İsrail də daxil olmaqla, beynəlxalq ictimaiyyətin bütün üzvləri tərəfindən hörmət edilməsini gözləyirik.
Dəməşqin müsbət reaksiyası
Suriya BMT Təhlükəsizlik Şurasının prezident Şaraa və daxili işlər naziri Xəttabı sanksiya siyahısından çıxarmaq qərarını alqışlayıb və bunu Dəməşqin artan diplomatik legitimliyinin sübutu adlandırıb.
"X" platformasında paylaşım edən xarici işlər naziri Əsəd Şeybani deyib: "Suriya diplomatiyası bir daha, sonuncu dəfə deyil, fəal iştirakını və maneələri aradan qaldırmaq və daha açıq və sabit Suriya gələcəyi üçün yol açmaq əzmini təsdiqləyir".
Suriya həmçinin ABŞ-a və dost ölkələrə Suriyaya və onun xalqına göstərdikləri dəstəyə görə minnətdarlığını bildirib.
