Venesuela prezidenti Nikolas Maduro bildirib ki, ölkəsi Rusiya istehsalı olan 5000 qısa mənzilli “İqla-S” raketinə malikdir və bu raketlər Karib dənizindəki ABŞ qüvvələrinə qarşı istifadə oluna bilər. Hərbi mərasimdə çıxış edən Maduro vurğulayıb ki, bu silahlar Venesuelanın hava hücumundan müdafiəsini gücləndirir və ölkənin suverenliyinin qorunmasına xidmət edir. Nikolas Maduro deyib: “Biz sülhü təmin etmək üçün əsas hava hücumundan müdafiə nöqtələrində ən azı 5 min raket saxlayırıq”.

Maduro həmçinin deyib ki, bu silahlar ölkənin “istənilən imperialist təhdidlərə” qarşı hazırlıqlı olmasını təmin edir. O, Venesuela silahlı qüvvələrinin vətənin hər kvadrat metrini müdafiə etməyə hazır olduğunu bəyan edib.

ABŞ hökuməti isə narkotik qaçaqmalçılığı ilə mübarizə əməliyyatları adı altında bölgəyə dəniz donanması göndərib. ABŞ qüvvələrinin Venesuela yaxınlığında şübhəli gəmilərə hücum etdiyi bildirilir. Venesuela rəsmiləri ABŞ-ın əməliyyatlarını ölkənin suverenliyinin pozulması kimi qiymətləndirir və Vaşinqtonu narkotiklərlə mübarizə adı altında təcavüz üçün bəhanə gətirməkdə ittiham edirlər.