Fələstin dövlət rəsmilərinin yaydığı məlumata görə, qeyri-qanuni israilli köçkünlər martın 14-də işğal altındakı İordan çayının qərb sahilində yerləşən bir kəndə hücum edərək, ikisi odlu silahla olmaqla beş fələstinlini yaralayıb.
Fələstin xəbər agentliyi “WAFA”nın yaydığı məlumata görə, hadisə Beytüllahimin şərqində yerləşən Kisan kəndi yaxınlığındakı Raşayda bölgəsində baş verib. Bildirilib ki, məskunlaşanlar kənd sakinlərinə həqiqi güllələrlə atəş açıblar.
Raşayda bölgəsinin bələdiyyə sədri Musa Abayat bildirib ki, iki fələstinli güllə yarası ilə xəstəxanaya çatdırılıb, üç nəfər isə kəsici alət və daşla xəsarət yetirilməsi nəticəsində yaralanıb.
M.Abayat həmçinin qeyri-qanuni israilli köçkünlərin 100 qoyunu oğurladıqlarını da qeyd edərək, bölgədə fələstinli sakinlərə qarşı həyata keçirilən gündəlik hücumları pisləyib.
Bölgənin bələdiyyə sədri Musa Abayat əlavə edib ki, hadisədən sonra İsrail qüvvələri əraziyə gəlib və yaralanan fələstinlilərdən bəzilərini saxlayıb.
Fələstin rəsmiləri və Birləşmiş Millətlər Təşkilatı bildirir ki, mart ayının əvvəlindən bu yana bölgədə qeyri-qanuni İsrailli köçkünlərin hücumları nəticəsində təxminən beş fələstinli həyatını itirib.
Fələstin Səhiyyə Nazirliyinin məlumatına görə, Qəzza soyqırımı başladıqdan bəri İordan çayının qərb sahilində İsrail qüvvələri və ya məskunlaşanlar tərəfindən azı 1.045 fələstinli öldürülüb.
