Türkiyə Prezidenti Rəcəb Tayyib Ərdoğan bildirib ki, Türkiyə yaşıl enerjiyə qoyulan investisiyalar mövzusunda lider mövqedədir və 2025-ci ilin ilk səkkiz ayında bərpa olunan enerjinin ümumi enerji gücündəki payı 60 faizi keçib.
Bu barədə Türkiyə Prezidenti Rəcəb Tayyib Ərdoğan İstanbulda keçirilən 11-ci Enerji Səmərəliliyi Forumu və sərgisində çıxışı zamanı bildirib. O, artan əhali və inkişaf edən iqtisadiyyata paralel olaraq qlobal enerji tələbatının da hər il artdığını vurğulayıb.
Prezident qeyd edib ki, hökumət 2002-ci ildən bu yana enerji səmərəliliyinin artırılması məqsədilə müxtəlif layihələr həyata keçirib.
“Bu ilin ilk səkkiz ayında enerji idxalına görә 26 milyard dollar ödәmişik. Bu xərcləri azaltmaq üçün ciddi səylər göstəririk. Hazırda gündəlik neft istehlakımız təxminən 1 milyon bareldir. Bunun 160 min barelini isə öz resurslarımız hesabına təmin edirik”, – deyə Rәcәb Tayyib Ərdoğan bildirib.
Prezident deyib: “Qara dəniz qazı və Gabar bölgəsindəki neft kəşflərimizdə mühüm irəliləyiş əldə etsək də, qarşımızda qət etməli olduğumuz məsafə var. Hazırda dörd qazma və iki seysmik kəşfiyyat gəmisinə sahibik. Bu baxımdan dünyada beşinci yerdəyik. Yeni gəmilərin inventara daxil olması ilə dördüncü yerə yüksələcəyik”.
Ərdoğan həmçinin Türkiyənin nüvə enerjisi sahəsində də irəliləyişlərə imza atdığını qeyd edib. O, bildirib ki, hazırda dünyanın 31 ölkəsində 416 aktiv nüvə reaktoru fəaliyyət göstərir və bunlar qlobal elektrik enerjisinin təxminən 9 faizini istehsal edir. Türkiyə də daxil olmaqla 15 ölkədə isə 63 reaktorun tikintisi davam edir.
“İnşallah, Akkuyu Atom Elektrik Stansiyasından ilk elektrik enerjisini çox yaxın zamanda əldə edəcəyik. Akkuyudan əlavə, digər nüvə enerji layihələrimiz də var və bu istiqamətdə danışıqlar davam edir”, – deyə dövlət başçısı qeyd edib.
Prezident həmçinin bildirib ki, Çinə və ABŞ-a son səfərləri zamanı bu mövzuda həmkarları ilə müzakirələr aparılıb:
“ABŞ ilə imzaladığımız Strateji Mülki Nüvə Əməkdaşlığına dair anlaşma memorandumu dinc məqsədli nüvə enerjisi sahəsində əməkdaşlığa əsaslanır. Bu saziş yeni nəsil texnologiyaların, o cümlədən qabaqcıl modul reaktorlar və kiçik reaktor texnologiyalarının inkişafını nәzәrdә tutur”.
Türkiyə iqtisadiyyatına da toxunan Ərdoğan bildirib ki, Türkiyə iqtisadiyyatının 2028-ci ildə 1,9 trilyon dollarlıq həcmə, adambaşına düşən milli gəlirin isə 21 min dollar səviyyəsinə yüksələcəyi proqnozlaşdırılır.
