Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaya Kallas bildirib ki, İttifaq Qəzzada atəşkəs razılaşmasını dəstəkləmək üçün oktyabrın 15-dən etibarən Qəzza ilə Misir arasındakı Rəfah keçid-məntəqəsinə nəzarət etmək üçün mülki işçi qrupunu yenidən işə salacaq.
K.Kallas HƏMAS-ın razılaşma çərçivəsində ilk israilli girov qrupunu sərbəst buraxmasından sonra "X" platformasında etdiyi paylaşımda "Aİ üzərinə düşəni etməyə hazırdır. Bu missiya atəşkəsin dəstəklənməsində mühüm rol oynaya bilər" deyib.
27 ölkədən ibarət İttifaq 2005-ci ildə Rəfah keçid-məntəqəsini izləmək üçün mülki işçi qrupu yaratdı, lakin Fələstinin müqavimət qrupu HƏMAS Qəzzaya nəzarəti ələ keçirdikdən iki il sonra bu missiya dayandırıldı.
Avropa İttifaqının (Aİ) Sərhədlərə Yardım Missiyası (EUBAM) əsas sərhəd keçid məntəqəsində neytral, üçüncü tərəfin mövcudluğunu təmin etmək məqsədi daşıyır. Missiyaya İtaliya, İspaniya və Fransadan olan polis qüvvələri daxildir.
Bu missiya yanvar ayında qısa müddətə yenidən yerləşdirildi, lakin mart ayında yenidən dayandırıldı.
Kallas bu gün girovların azad edilməsini alqışlayaraq, Donald Trampın "sülh üçün kritik dönüş nöqtəsində" rolunu vurğulayıb və ABŞ prezidentinin "bu irəliləyişi mümkün hala gətirdiyini" söyləyib.
Avropa Komissiyasının sədri Ursula von der Leyen isə bu gün (13 oktyabr 2025) Şarm əl-Şeyxdə keçirilən Qəzza sammitini “tarixi dönüş nöqtəsi” kimi qiymətləndirib.
"Aİ ABŞ, Qətər, Misir və Türkiyənin vasitəçiliyi ilə həyata keçirilən sülh planını tam dəstəkləyir" deyə fon der Leyen qeyd edib.
"Biz əlimizdə olan bütün vasitələrlə bu planın uğuruna töhfə verməyə hazırıq" deyən von der Leyen "Fələstin Administrasiyasının idarəetmə və islahat səylərini dəstəkləmək" daxil olmaqla, töhfə verəcəklərini sözlərinə əlavə edib.
Qeyd edək ki, Aİ-ni Şarm əl-Şeyxdə Avropa Şurasının sədri Antonio Kosta təmsil edir.
