Türkiyə prezidenti Rəcəb Tayyib Ərdoğan Fələstin Dövlətini tanımaq qərarına gələn ölkələri tərifləyərək, bu cür addımların iki dövlət həlli üçün “kritik mərhələlər” olduğunu deyib.
Sentyabrın 22-də Nyu-Yorkda BMT-nin Fələstin konfransında çıxış edən Ərdoğan tanınma qərarlarının “iki dövlətli həllin həyata keçirilməsini sürətləndirəcəyinə” ümid etdiyini bildirib.
Ərdoğan BMT Təhlükəsizlik Şurasının bəzi üzvlərinin Fələstini tanımaq qərarını “çox mühüm, tarixi qərar” kimi qiymətləndirib.
Ərdoğan İsrailin Qəzzada apardığı müharibəni sərt şəkildə tənqid edib.
Dövlət başçısı “Qəzzada qətliam dayanmadan davam edir və vicdanı olan heç kim belə bir soyqırım qarşısında səssiz qala bilməz. Bu da bir faktdır ki, Fələstin məsələsi bu gün qlobal problemə çevrilib” deyib.
Ərdoğan Benyamin Netanyahu hökumətini Fələstin dövlətinin qurulmasını qeyri-mümkün etməyə çalışmaqda ittiham edib.
Dövlət başçısı “Netanyahu hökumətinin məqsədi Fələstin dövlətinin yaradılmasını qeyri-mümkün etmək və fələstinliləri mümkün qədər zorla köçürməkdir" deyib.
O, İsrailin tarixinə toxunaraq əlavə edib: "Bir zamanlar Holokostdan əziyyət çəkən bir cəmiyyətdən gələn Netanyahu hökuməti indi minlərlə il torpaq və su paylaşdığı qonşularına qarşı soyqırım törədir".
Fransa və Səudiyyə Ərəbistanının BMT-də birgə təşkil etdiyi iki dövlətli həll sammiti İsrail və ABŞ tərəfindən boykot edilib. Bununla belə, Fransanın Fələstin dövlətini tanıması və digər dövlətlərin də buna əməl edəcəyinə söz verməsi ilə bu tədbir fələstinlilər üçün əhəmiyyətli diplomatik uğura çevrildi.
BMT-dən Baba Umarın "TRT World" üçün hazırladığı xəbərə görə, tədbirdə iştirak edən digər dünya liderlərinin dəstəkləyici bəyanatları artan beynəlxalq konsensusu daha da vurğulayıb.
Təcili tədbirlər çağırışı
Ərdoğan beynəlxalq ictimaiyyəti İsrailin işğal altındakı İordan çayının qərb sahilində qeyri-qanuni məskunlaşma genişlənməsini və Şərqi Qüdsdəki “oldu-bitdi” hərəkətlərini dayandırmağa çağırıb.
Dövlət başçısı "İsrailin dərinləşən işğal və ilhaq siyasətlərinin aydın məqsədi iki dövlətli həll vizyonunu öldürmək və fələstinliləri sürgünə göndərməkdir; bu tamamilə qəbuledilməzdir" dedi.
O, təcili tədbirlərin görülməsinin vacibliyini də vurğulayaraq deyib:
“Qəzzada dərhal atəşkəs əldə etmək, humanitar yardımın maneəsiz çatdırılması və İsrail qüvvələrinin geri çəkilməsi artıq zəruridir".
