Qazaxıstan dövləti Ukraynanın noyabrın 29-da Qara dənizdəki bir neft terminalına yönəlik hücumunu rəsmi şəkildə qınayıb. Rəsmi Astana bu hadisəni “qəsdən hücum” kimi xarakterizə edərək, insidentlə bağlı etiraz notası təqdim edib. Bundan əlavə, Ukraynadan gələcəkdə oxşar hadisələrin qarşısını almaq üçün təsirli tədbirlər görməsini tələb edib.
Bu barədə Qazaxıstan XİN sözçüsü Aybek Smadiyarov noyabrın 30-da (bu gün) verdiyi açıqlamada bildirib. Onun sözlərinə görə, hücum Rusiyanın cənubundakı Novorossiysk Limanı yaxınlığında “kritik infrastruktur” sayılan və Xəzər Boru Kəməri Konsorsiumuna (CPC) məxsus obyektə istiqamətlənmişdi.
A.Smadiyarov deyib: “Bu hadisə tamamilə mülki xarakter daşıyan və fəaliyyəti beynəlxalq hüquq normaları ilə təminat altına alınmış bir obyektə edilən üçüncü hücum cəhdidir. Bu baş verənləri Qazaxıstan Respublikası ilə Ukrayna arasındakı ikitərəfli münasibətlərə zərər verən bir addım kimi qiymətləndiririk və Ukrayna tərəfinin gələcəkdə belə halların qarşısını almaq üçün təsirli tədbirlər görməsini gözləyirik.”
Qazaxıstanın enerji resurslarının sabit və fasiləsiz tədarükündən yana olduğunu qeyd edən A.Smadiyarov bildirib ki, CPC qlobal enerji sisteminin sabitliyinin təmin edilməsində mühüm rol oynayır.
“Qəbuledilməzdir”
Noyabrın 29-da CPC tərəfindən yayılan açıqlamada bildirilib ki, pilotsuz uçuş aparatları (PUA) ilə həyata keçirilən hücum nəticəsində terminaldakı yanacaq qurğularından biri zədələnib və Rusiya rəsmilərinin göstərişi ilə yükləmə və digər əməliyyatlar dayandırılıb.
Hücum nəticəsində həm insan itkisinin olmadığı həm də ilkin məlumatlara görə, Qara dənizə neft sızması qeydə alınmayıb.
Qazaxıstan Energetika Nazirliyi də həmin gün bəyanat yayaraq hücumu pisləyib və “tamamilə mülki kritik infrastruktura yönəlmiş bu kimi hərəkətləri qəbuledilməz” adlandırıb. Açıqlamada hücumun kimin tərəfindən törədildiyi barədə məlumat verilməyib.
Rusiya hadisə ilə bağlı hələlik rəsmi açıqlama verməyib, lakin RİA da daxil olmaqla bir neçə dövlət mediası Novorossiysk Limanındakı terminalın Ukraynanın hücumu nəticəsində zərər gördüyünü yazıb.
Ukrayna rəsmiləri isə nə insident, nə də Qazaxıstanın bəyanatları barədə hələlik şərh verməyiblər.
Qeyd edək ki, CPC tərəfindən idarə olunan 1.500 kilometrlik boru kəməri Qazaxıstanın Xəzər sahilində yerləşən “Tengiz” yatağından çıxarılan nefti Novorossiyskdakı dəniz terminalına nəql edir.
