İsrail ordusu işğal altındakı İordan çayının qərb sahilində uçan mülki təyyarəni pilotsuz uçuş aparatı (PUA) zənn edərək səhvən atəşə tutduğunu etiraf edib. İsrail mediasının yaydığı məlumata görə, hadisə mayın 28-də sözügedən təyyarə Tel-Əviv yaxınlığındakı Ben Qurion Beynəlxalq Hava Limanına doğru hərəkət edərkən qeydə alınıb.

“The Times of Israel” qəzetinin məlumatına görə, hərbçilər təyyarəyə atəş açdıqdan sonra ordu hadisə ilə bağlı araşdırmaya başlayıb. İnsident İordan çayının qərb sahilindəki Beyt El bölgəsi yaxınlığında baş verib.

Hadisədən əvvəl yerli sakinlərin bölgədə bir neçə naməlum PUA gördükləri barədə rəsmilərə məlumat verdiyi bildirilir. Bununla əlaqədar ərazidə axtarış aparmaq üçün göndərilən hərbi bölmələrdən biri hava obyektini səhvən düşmən dronu hesab edərək ona atəş açıb. Müəyyən edilib ki, Ben Qurion Hava Limanına eniş edən təyyarələrin uçuş marşrutları şərqə doğru yönləndirildiyi üçün onlar Beyt El rayonu üzərində nisbətən aşağı hündürlükdə uçublar və bu da hərbçilər arasında çaşqınlığa səbəb olub.

Hadisə nəticəsində təyyarəyə heç bir ziyan dəymədiyi və xəsarət alanın olmadığı bildirilsə də, hərbçilər hava gəmisinə qarşı hansı növ silahdan atəş açıldığını dəqiqləşdirməyiblər.