Türkiyə Milli Müdafiə Nazirliyi noyabrın 11-də açıqlama yayaraq bildirib ki, Gürcüstanda baş verən qəza nəticəsində 20 Türkiyə hərbçisi şəhid olub.
Nazirliyin noyabrın 12-də verdiyi son açıqlamada isə qeyd olunub:
“Azərbaycan–Gürcüstan sərhədi yaxınlığında qəzaya uğrayan hərbi yük təyyarəmizin qalıqları ilə bağlı axtarış-xilasetmə və hadisə-araşdırma qrupları Gürcüstan rəsmiləri ilə koordinasiyalı şəkildə saat 06:30-da işə başlayıb.”
Məlumata görə, Türkiyəyə məxsus C-130 tipli hərbi nəqliyyat təyyarəsində 20 hərbçi olub. Təyyarə Azərbaycandan Türkiyəyə qayıdarkən qəzaya uğrayıb.
Müdafiə Nazirliyi şəhid olan 20 hərbçinin adlarını ictimaiyyətə açıqlayıb.
Türkiyə Prezidenti Rəcəb Tayyib Ərdoğan noyabrın 11-də Azərbaycan Prezidenti İlham Əliyev və Gürcüstanın Baş naziri İrakli Kobaxidze ilə ayrıca telefon danışığı apararaq davam edən axtarış-xilasetmə əməliyyatları ilə bağlı son məlumatları müzakirə edib.
Paytaxt Ankarada keçirilən tədbirdə çıxış edən Prezident R.T.Ərdoğan şəhidlərin ailələrinə başsağlığı verib.
Qəzanın səbəbi hələlik məlum deyil.
Hadisədən sonra dünyanın bir çox ölkələrindən və dövlət başçılarından Türkiyəyə həmrəylik və başsağlığı mesajları ünvanlanıb.
