Livan mediasının məlumatına görə, livanlı maronit keşişi Pyer əl-Rahi İsrail ordusunun sərhəd bölgəsində yerləşən əl-Qlaiya kəndinə hücumu zamanı həlak olub. Bildirilir ki, keşiş hücum zamanı aldığı ağır xəsarətlər nəticəsində həyatını itirib.

Hadisə İsrailin Livanın cənubunda, Beyrut ətrafında və Bekaa vadisində həyata keçirdiyi intensiv bombardmanlar fonunda baş verib. Livan mediasının məlumatına görə, İsrailə məxsus “Merkava” tankı əl-Qlaiya kəndində yerləşən yaşayış evinə iki dəfə atəş açıb.

İlk mərmi zərbəsi nəticəsində ev sahibi və onun həyat yoldaşı yaralanıb. Keşiş Pyer əl-Rahi və bir neçə qonşu yaralılara kömək etmək üçün hadisə yerinə gəldiyi zaman tank evi ikinci dəfə hədəf alıb. Məhz bu təkrar hücum zamanı ağır yaralanan keşişin həyatını xilas etmək mümkün olmayıb.

Hücum nəticəsində çox sayda mülki vətəndaşın da yaralandığı bildirilir.

Qeyd olunur ki, Pyer əl-Rahi bir müddət əvvəl digər keşişlərlə birlikdə İsrailin xristian kəndi olan əl-Qlaiyanı təxliyə etmək barədə verdiyi hərbi əmrə tabe olmaqdan imtina etmişdi. Mərcayun bölgəsində İsrail sərhədindən bir neçə kilometr məsafədə yerləşən bu Maronit kəndinin təxminən 8000 sakini var. OSV xəbər agentliyinə müsahibə verən livanlı keşiş Jan Yunis həmkarının ölümü ilə bağlı dərin kədərini ifadə edərək, Pyer əl-Rahinin əslən Dibeh kəndindən olduğunu, lakin əl-Qlaiya icmasına rəhbərlik etdiyini vurğulayıb.