Belçika Baş nazirinin müavini və xarici işlər naziri Maksim Prevo Avropa şirkətlərinin yaxın və etibarlı tərəfdaş axtarışının artdığını bildirib. Nazir qeyd edib: "Türkiyə Avropanın təchizat zəncirini daha dözümlü etməyə kömək edə biləcək istehsal gücünə, sənaye təcrübəsinə və qonşu bazarlarla əlaqələrə malikdir. İnanıram ki, münasibətlərimiz bu ortaq maraqları daha aydın şəkildə əks etdirməlidir."

M.Prevo bu sözləri Brüsseldə Xarici İqtisadi Əlaqələr Şurası (DEİK) və Avropa Biznes Sammitinin (EBS) birgə təşkilatçılığı ilə keçirilən Türkiyə-Aİ Biznes Sammitinin açılışında deyib.

Milyonlarla avropalının türk mənşəli olduğunu xatırladan M.Prevo çıxışına belə davam edib: "Belçikadakı türk icması Türkiyə ilə sıx əlaqələrini qoruyub saxlayır. Onlar nəsillər boyu cəmiyyətimizə töhfə verirlər. Aramızdakı əlaqələr həm də uzunillik tərəfdaşlığa dayanır."

M.Prevo Türkiyənin NATO-nun ikinci ən böyük ordusuna malik müttəfiq kimi qitənin cənub-şərq cinahını müdafiə etdiyini vurğulayıb. O, Türkiyənin Aİ-yə namizəd ölkə statusunda olduğunu bildirib. Nazir, həmçinin Türkiyənin Avropa, Asiya və Yaxın Şərqi bir-birinə bağlayan böyük sənaye iqtisadiyyatına sahib olduğunu diqqətə çatdırıb.

M.Prevo məsələyə belə münasibət bildirib: "Avropa şirkətləri getdikcə daha çox özlərinə yaxın və etibarlı tərəfdaşlar axtarırlar. Türkiyə Avropanın təchizat zəncirini daha dözümlü etməyə kömək edə bilər. Ölkə bu potensialı təmin edəcək istehsal gücünə, sənaye təcrübəsinə və qonşu bazarlarla əlaqələrə malikdir. İnanıram ki, münasibətlərimiz bu ortaq maraqları daha aydın şəkildə əks etdirməlidir."

"Türkiyə geniş regionun bazarlarına açılan bir qapıdır"

Avropanın təchizat zəncirini daha güclü və dözümlü etməli olduğunu bildirən M.Prevo deyib: "Avropa şirkətləri harada istehsal həyata keçirəcəklərini yenidən qiymətləndirirlər. Məhsullarını haradan tədarük edəcəklərini də nəzərdən keçirirlər. Bu prosesdə Türkiyə mühüm rol oynayır. Türkiyə təkcə sənaye tərəfdaşı deyil. O, həm də daha geniş regionun bazarlarına açılan bir qapıdır. Xüsusilə Avropanın strateji asılılıqlarını azaltmalı olduğu sektorlarda bu yaxınlıqdan daha yaxşı yararlanmalıyıq."

Belçikanın da bu səylərə töhfə vermək istədiyini vurğulayan M.Prevo nitqini bu sözlərlə yekunlaşdırıb: "Daha çox birgə layihə vi sənaye əməkdaşlığı ilə bu uğuru daha da irəli aparmağı hədəfləyirik. Gələn həftə də burada, “Eqmont Sarayı”nda Türkiyə ilə üçtərəfli görüşlərimiz keçiriləcək. Bu görüşlərdə xarici işlər, ədliyyə və daxili işlər sahələrində əməkdaşlığımızı müzakirə edəcəyik."