İndoneziyada xilasedici qruplar ötən həftə Şərqi Yava əyalətində dağılmış internat tipli məktəbin dağıntıları altında qalan qurbanların axtarışlarını başa çatdırıblar. Rəsmilər hadisə nəticəsində həlak olanların sayının 61 nəfərə çatdığını bildiriblər.

Hadisə tələbələr günorta namazına toplaşarkən baş verib. Məlumata görə, çoxmərtəbəli binanın bir hissəsi qəfil uçub.

Təbii fəlakətlərin idarə olunması agentliyi binada olan 61 nəfərin cəsədinin tapıldığını açıqlayıb.

Axtarış-xilasetmə agentliyinin rəhbəri Məhəmməd Syafii deyib:
“Əl Xozini məktəbinin dağılması ilə bağlı əməliyyatlar rəsmən başa çatıb’’.

Xilasedicilər iri beton parçalarını aradan qaldırmaq üçün ekskavator və qaldırıcı kranlardan istifadə ediblər.

“Əl Xozini” məktəbi ölkədə “pesantren” (mədrəsə) kimi tanınan 42 mindən çox internat tipli məktəblərdən biridir. İctimai İşlər Nazirliyinin məlumatına görə, bu məktəblərdən yalnız 50-nin lisenziyası var.