Türkiyənin xarici işlər naziri Hakan Fidan ABŞ rəsmilərinə İranla bağlı problemlərin hərtərəfli bir razılaşma əvəzinə mərhələli şəkildə həll olunmasını tövsiyə edib.
Fidan ABŞ-nin İrana potensial hücumunun "səhv" olacağını bildirib və Vaşinqton və Tehranı fikir ayrılıqlarını diplomatik yolla həll etməyə çağırıb.
Yanvarın 28-də "Al Jazeera"yə verdiyi müsahibədə Fidan İranla gərginliyin artması və ABŞ hərbi qüvvələrinin Yaxın Şərqə yerləşdirilməsi fonunda regional əməkdaşlığın vacibliyini vurğulayaraq deyib: "Müharibəni yenidən başlatmaq səhvdir".
İki ölkə arasında sərt ifadələrə baxmayaraq, diplomatik həllin hələ də mümkün olduğunu vurğulayan Fidan deyib ki, İran nüvə məsələsini yenidən müzakirə etməyə hazırdır.
Nazir Fidan İranla bağlı problemlərin hərtərəfli bir razılaşma əvəzinə mərhələli şəkildə həll olunmasını tövsiyə edərək deyib: "Amerikalı dostlarımıza məsləhətim İranla olan məsələləri bir-bir həll etməkdir. Nüvə ilə başlayın, onu bitirin, sonra digərlərini həll edin".
Fidan əlavə edib ki, “Bütün məsələləri vahid paket kimi təqdim etsəniz, iranlı dostlarımız üçün bunu həzm etmək, üzərində işləmək və həyata keçirmək çox çətin olacaq. Bəzən bu, hətta onlara alçaldıcı görünə bilər. Bunu təkcə onlara deyil, həm də rəhbərliyə izah etmək çətin olacaq”.
Xarici işlər naziri Fidan həmçinin bildirib ki, İran regional nizamda “əla yer” tapa bilər, lakin qonşu ölkələrlə etimad yaratmalıdır.
Türkiyə xarici işlər naziri həmçinin vurğulayıb ki, fərqli ideologiyalara və məzhəblərə baxmayaraq, regiondakı ölkələr milli dövlət sistemi daxilində əməkdaşlıq etməlidirlər.
