Tibbi mənbələrin verdiyi məlumata görə, İsrail qüvvələri Qəzzanın cənubunda və Xan Yunis şəhərinin şərqində iki fələstinlini qətlə yetirib. Bununla da İsrail tərəfi 2025-ci ilin oktyabrında əldə olunmuş atəşkəs razılaşmasını növbəti dəfə pozmuş olub. Yerli mənbələr bildirir ki, hadisələrdən biri Xan Yunisin şərqində, "Sarı Xətt" yaxınlığındakı Şeyx Nasir ərazisində baş verib.

Qeyd edək ki, "Sarı Xətt" atəşkəs müqaviləsinə əsasən, Qəzzanın 50 faizindən çoxunu əhatə edən İsrail hərbi işğal zonaları ilə fələstinlilərin sərbəst hərəkət edə bildiyi qərb ərazilərini ayıran şərti sərhəddir. Şahidlərin sözlərinə görə, hücum Xan Yunisin şərqində yerləşdirilən İsrail hərbi texnikasından açılan intensiv atəşlə müşayiət olunub.

Nasir Xəstəxanasından verilən məlumata görə, həmin şəhərin işğal zonasından kənarda qalan hissəsində daha bir fələstinli İsrail hərbçilərinin açdığı atəş nəticəsində həyatını itirib. Cənubdakı Rəfah şəhərində isə vəziyyət gərgin olaraq qalır. Şahidlər İsrail qüvvələrinin şəhərin şimalındakı yaşayış binalarını dağıtmağa davam etdiyini, ərazidən güclü partlayış səslərinin gəldiyini və tüstü buludlarının yüksəldiyini bildiriblər.

Atəşkəs qüvvəyə mindiyi tarixdən bu yana İsrailin törətdiyi hücumlar nəticəsində ümumilikdə 492 fələstinlinin öldürüldüyü, 1356 nəfərin isə yaralandığı qeyd edilir. Sözügedən razılaşmanın əsas məqsədi İsrailin iki ildir davam edən və genişmiqyaslı dağıntılara səbəb olan hərbi əməliyyatlarına son qoymaq idi.

Xatırladaq ki, 2023-cü ilin oktyabrından bəri davam edən hücumlar nəticəsində 71 mindən çox fələstinli həlak olub, 171 mindən çox insan isə yaralanıb. Qəzzadakı mülki infrastrukturunun təxminən 90 faizinin məhv edildiyi bildirilir. BMT-nin məlumatına əsasən, bölgənin yenidən qurulması üçün təxminən 70 milyard dollar vəsaitə ehtiyac var.