Fransa rəsmisi Pakistanın gecə saatlarında Hindistanla baş vermiş toqquşma nəticəsində Hindistan Hərbi Hava Qüvvələrinə məxsus bir “Rafale” döyüş təyyarəsini vurduğunu və bunun Fransa istehsalı olan ilk döyüş itkisi olacağını və məsələ ilə bağlı araşdırma aparıldığını bildirib.
Pakistan tərəfi mayın 7-də bəyan edib ki, Çin istehsalı “J-10C” təyyarələrindən istifadə edərək üçü “Rafale” olmaqla ümumilikdə beş Hindistan döyüş təyyarəsini məhv edib.
“The New York Times” qəzetində dərc olunmuş xəbərə istinadən, Hindistanda və onun nəzarətində olan Kəşmirdə iki təyyarə yerə çırpılıb.
İnternetdə yayımlanan görüntülərdə Hindistanın Pakistanla sərhədində - Pəncab əyalətinin Bathinda bölgəsindəki bir tarlada “Rafale” təyyarəsinin quyruq qanadları və sükan hissələri göstərilib. Qalıqlar arasında “BS-001” seriya nömrəsi aşkar edilib ki, bu da həmin təyyarənin bir nəfərlik “Rafale EH” olduğunu deməyə əsas verib.
Eyni zamanda, Pakistan ordusu bildirib ki, Hindistanın raket hücumları və Kəşmiri ikiyə bölən faktiki sərhəd kimi nəzarət xətti boyu baş verən toqquşmalar nəticəsində təxminən 31 mülki şəxs həlak olub və 57 nəfər yaralanıb.
Bu gərginlik Hindistanın nəzarətində olan Kəşmirin Pahalqam bölgəsində 22 apreldə silahlılar tərəfindən 26 nəfərin öldürüldüyü hücumdan sonra baş verib. Hindistan ictimaiyyətə heç bir sübut göstərmədən bu terror hadisəsinə “sərhədin o tayından dəstək verildiyi”ni iddia edib və dərhal Pakistana qarşı ittiham irəli sürüb. Rəsmi İslamabad isə bu iddiaları rədd edərək üçüncü tərəfin nəzarətində neytral araşdırmaya çağırıb.
Pakistandan cavab
Pakistanın Baş naziri Şahbaz Şərif bildirib: “Ordumuzun beş Hindistan döyüş təyyarəsini vurması bizdən onlara cavabdır. Əsgərlərimiz düşmən təyyarələrini məhv etdilər”.
Şərif mayın 7-də etdiyi televiziya çıxışında “Hindistanın Pakistana hücum etməklə səhvə yol verdiyini və bunun nəticələrinə qatlanmaq məcburiyyətində qalacağını” deyib.
Məsələ ilə əlaqədər Fransız aviasiya istehsalçısı “Dassault Aviation” şərh verməkdən imtina edib. Fransız ordusu da rəsmi açıqlama verməyib, lakin Hindistan müdafiə rəsmiləri ilə sıx əlaqədə olduğu bildirilir.
Xatırladaq ki, Hindistan 2016-cı ildə Fransa ilə yüksək profilli müqavilə imzalayaraq 36 “Rafale” təyyarəsi alıb və bu yolla köhnələn hava gücünü regional gərginliyin artdığı bir dövrdə müasirləşdirməyi qarşısına məqsəd qoyub. İki mühərrikli bu təyyarə həm hava döyüşləri, həm də dərin hücum əməliyyatları üçün təchiz edilmiş, dünyanın çoxfunksiyalı döyüş təyyarələrindən biri hesab olunur.
