ABŞ Dövlət Katibi Marko Rubio Ermənistan və Azərbaycan arasında sülh sazişini alqışlayıb və regionda davamlı təhlükəsizlik və rifahın vacibliyini vurğulayıb.
Dövlət Departamentinin sözçüsü Tammi Bryus çərşənbə axşamı Rubio ilə Ermənistanın baş naziri Nikol Paşinyan arasında baş tutan telefon danışığından sonra açıqlama verib. Tammi Bryus deyib: “Dövlət katibi Azərbaycanla sülh sazişini alqışlayıb və Cənubi Qafqaza təhlükəsizlik və firavanlıq gətirəcək davamlı sülhün vacibliyini vurğulayıb”.
Bəyanatda Rubio və Paşinyanın Cənubi Qafqazda hər hansı gərginliyin artmasının qəbuledilməz olduğu barədə razılığa gəldikləri bildirilib.
Tərəflər həmçinin ölkələri arasında strateji tərəfdaşlığa əsaslanan ümumi maraqları nəzərə alaraq ikitərəfli əməkdaşlığı gücləndirmək öhdəliyini bir daha təsdiqləyiblər. Telefon danışığı Azərbaycan və Ermənistan sülh sazişi üzrə razılığa gəldiklərini bəyan etdikdən bir neçə gün sonra baş tutub.
