Pakistanın Baş naziri Şahbaz Şərif Səudiyyə Ərəbistanı və Türkiyə liderləri ilə danışıqlar aparmaq üçün bu ölkəyə üçgünlük səfərə yola düşüb.

Baş Nazir Aparatından verilən açıqlamaya görə, Pakistanın Baş naziri Şahbaz Şərif cümə günü Səudiyyə Ərəbistanına üçgünlük səfərinə müqəddəs Məkkə şəhərində Ümrə ziyarəti ilə başlayıb.

Şərif ikitərəfli əməkdaşlıq və regional məsələlərə diqqət yetirmək məqsədilə cümə axşamı (6 avqust 2026) Səudiyyə Ərəbistanına gəlib.

Onu Ciddədəki Kral Əbdüləziz Beynəlxalq Hava Limanında Məkkə vilayətinin qubernator müavini Şahzadə Səud bin Mişaal bin Əbdüləziz qarşılayıb.

Şərifin ikitərəfli əməkdaşlığın gücləndirilməsi, eləcə də regional və beynəlxalq prosesləri müzakirə etmək üçün Səudiyyə Ərəbistanının Vəliəhd Şahzadəsi və Baş naziri Məhəmməd bin Salmanla görüşü planlaşdırılır.

Səfər İslamabadın Vaşinqton və Tehran arasında vasitəçilik missiyasını davam etdirdiyi bir vaxta təsadüf edir.

İyun ayında Qətər ABŞ və İran arasında gedən danışıqlarda Pakistana qoşulub. Bu addım 18 iyunda anlaşma memorandumunun imzalanması və yekun razılaşmaya doğru danışıqların başlaması ilə nəticələnib.

Daha sonra danışıqlar Hörmüz boğazında dəniz təhlükəsizliyi və gəmilərin sərbəst keçidi ilə bağlı fikir ayrılıqları səbəbindən dalana dirənsə də, son zamanlar İran, Oman və ABŞ rəsmiləri açıq qalan məsələlərin həllində irəliləyiş əldə olunduğunu bildiriblər.

Xatırladaq ki, Pakistan və Səudiyyə Ərəbistanı ötən ilin sentyabr ayında Strateji Qarşılıqlı Müdafiə Sazişi imzalayıblar.