Vaşinqtonun İrana qarşı mövqeyini sərtləşdirməsi ilə, "USS Gerald R. Ford" təyyarədaşıyan gəmi Yaxın Şərq bölgəsində "USS Abraham Linkoln" ilə birlikdə yerləşdiriləcək.
"New York Times" qəzetinin məlumatına görə, hazırda Karib dənizində olan "USS Gerald R. Ford" və onun müşayiət gəmiləri Yaxın Şərqə göndəriləcək. Onların aprelin sonu və ya may ayının əvvəlinə qədər ABŞ-yə qayıtması gözlənilmir.
Adının açıqlanmaması şərti ilə qəzetə danışan dörd amerikalı rəsmi gəmi heyətinin fevralın 12-də qərardan xəbərdar edildiyini söyləyib.
"USS Gerald R. Ford" zərbə qrupu prezident Donald Trampın İrana getdikcə daha güclü təzyiqini dəstəkləmək üçün Körfəzdə "USS Abraham Linkoln"a qoşulacaq.
Tramp əvvəllər bölgədə ikinci bir təyyarədaşıyan gəminin olmasını tələb etmişdi, lakin gəminin adı dəqiqləşdirilməmişdi.
Ötən ay ABŞ prezidenti böyük donanmanın İrana doğru irəlilədiyini bildirərək, Tehranı razılığa gəlməyə çağırıb, əks halda növbəti hücumun daha pis olacağı barədə xəbərdar edib.
"Razılaşma bağlamalıyıq”
Tramp bildirib ki, "USS Abraham Linkoln" başda olmaqla İrana yaxınlaşan donanma əvvəllər Venesuelaya göndərilən donanmadan daha böyükdür və lazım gələrsə, missiyasını tez və güclü şəkildə yerinə yetirməyə hazır və qadirdir.
Donald Tramp həmçinin fevralın 12-də ABŞ-nin İranla razılaşma bağlamasının vacibliyini vurğulayıb və mart ayında razılaşma əldə edilə biləcəyini bildirib.
Tramp jurnalistlərə deyib: “Biz razılaşma bağlamalıyıq, əks halda bu vəziyyət, çox travmatik, çox travmatik olacaq”.
İsrail Baş naziri Benyamin Netanyahu da Trampın İrana hərbi hücumun qarşısını almaq üçün razılaşma üçün lazımi şərait yaratdığına ümid etdiyini bildirib.
"USS Gerald R. Ford" əvvəlcə Avropa turu kimi planlaşdırılan, lakin Trampın Venesuelaya qarşı sərt tədbirlərini dəstəkləmək üçün Karib dənizinə yönləndirilən missiya üçün 24 iyunda Virciniya ştatının Norfolk şəhərindən yola düşüb.
"USS Gerald R. Ford" təyyarədaşıyan gəmisindən təyyarələr 3 yanvarda Venesuela prezidenti Nikolas Maduronun qaçırılması ilə nəticələnən əməliyyatda iştirak edib.
Martın əvvəlində ABŞ-yə qayıtması planlaşdırılan zərbə qrupunun missiyası uzadılıb.
Məlumata görə, bu son gecikmə "USS Gerald R. Ford"un Virciniyada əsaslı təmir və modernləşdirmə üçün planlaşdırılan quru hovuz (dry dock) dövrünü təhlükə altına alacaq.
