İranın xarici işlər nazirinin müavini Məcid Taxt-Rəvançi bildirib ki, Vaşinqton rəhbərliyi sanksiyaların ləğvini müzakirə etməyə hazır olacağı təqdirdə, rəsmi Tehran ABŞ ilə nüvə sazişinə nail olmaq üçün mümkün güzəştləri nəzərdən keçirməyə hazırdır.

Lakin İranın yüksək vəzifəli diplomatı ötən il razılaşmanın əldə olunmasına mane olan əsas amillərindən biri olan uranın zənginləşdirilməsinin sıfıra endirilməsi tələbi ilə yenə də razılaşmayacaqlarını vurğulayıb. Çünki İran nüvə silahı əldə etmək niyyətində olmadığını vurğulayır. ABŞ isə İran ərazisində zənginləşdirmə prosesini nüvə silahına aparan yol kimi qiymətləndirir.

BBC-də fevralın 15-də yayımlanan müsahibəsində M.Taxt-Rəvançi bu ay Omanda tərəflər arası danışıqların bərpasından sonra fevralın 17-də Cenevrədə nüvə danışıqlarının ikinci mərhələsinə keçiləcəyini bildirib. İranlı diplomat deyib: “(İlk görüşlər) ümumilikdə müsbət istiqamətdə keçdi, lakin yekun nəticə barədə danışmaq üçün hələ tezdir.”

İran daha əvvəllər də nüvə proqramına tətbiq olunacaq məhdudiyyətləri sanksiyaların ləğvi müqabilində müzakirə etməyə hazır olduğunu bəyan etsə də, bu məsələnin raket proqramı da daxil olmaqla digər mövzularla əlaqələndirilməsini dəfələrlə rədd edib.

Mənbənin fevralın 13-də verdiyi məlumata görə, ABŞ nümayəndə heyəti, o cümlədən Stiv Vitkoff və Cared Kuşner fevralın 17-də səhər İran tərəfi ilə görüşəcək. Bildirilir ki, ABŞ-İran təmaslarında Oman nümayəndələri vasitəçilik edəcəklər.

Xatırladaq ki, ABŞ prezidenti Donald Tramp vəzifədə olduğu ilk müddətdə keçmiş prezident Barak Obamanın xarici siyasətdə əsas nailiyyəti hesab edilən 2015-ci il tarixli İranla Birgə Hərtərəfli Fəaliyyət Planından (BHFP) ABŞ-ı çıxarmışdı. Sözügedən saziş rəsmi Tehranın nüvə proqramını atom bombası hazırlamaq imkanına çatmayacaq səviyyədə məhdudlaşdırması müqabilində İran üzərindəki bəzi sanksiyaların yüngülləşdirilməsini nəzərdə tuturdu.