Martın 25-də (bu gün) səhər saatlarında Bağdadın qərbində yerləşən “Həbaniyyə” bazasında hərbi klinika və mühəndis bölməsinə həyata keçirilən hava hücumu nəticəsində 7 hərbçinin həlak olduğu, 13 hərbçinin isə yaralandığı bildirilir. Məsələ ilə bağlı açıqlama İraq Müdafiə Nazirliyi tərəfindən verilib.

Nazirlik “X” üzərindən yaydığı məlumatda bildirib ki, axtarış-xilasetmə qrupları ərazidə fəaliyyətini davam etdirir. Açıqlamada qeyd olunub ki, hücum hərbçilərin “milli və humanitar vəzifələrini” yerinə yetirdiyi vaxt baş verib və insan tələfatına səbəb olub.

Nazirlik hücumu “tibbi obyektlərin və tibb personalının hədəf alınmasını qadağan edən beynəlxalq hüquq və normaların açıq və ciddi pozuntusu” kimi qiymətləndirib.

Hücumun “təhlükəli eskalasiya” olduğunu vurğulayan nazirlik səhiyyə obyektlərinin hədəf alınmasının “ağır cinayət” təşkil etdiyini bildirib.

İraq “cavab verəcək”

İraq Müdafiə Nazirliyi hücumun şəxsi heyəti qorxutmayacağını qeyd edərək, İraqın “qüvvədə olan qanunvericiliyə uyğun şəkildə cavab vermək üçün bütün zəruri tədbirləri görmək hüququnu özündə saxladığını” açıqlayıb.

Xatırladaq ki, ABŞ və İsrail fevralın 28-dən etibarən İrana qarşı hava hücumlarını davam etdirir. Bu hücumlar nəticəsində, həmin dövrün ali dini lideri Əli Xameneinin də daxil olduğu 1340-dan çox insan həyatını itirib.

Tehran hakimiyyəti isə İsraillə yanaşı, ABŞ-nin hərbi bazalarına ev sahibliyi edən İordaniya, İraq və Körfəz ölkələrini hədəf alan pilotsuz uçuş aparatları və raket hücumları ilə cavab verib. Bu hücumlar insan tələfatına, infrastrukturun zədələnməsinə, həmçinin qlobal bazarlarda və aviasiya sahəsində fasilələrə səbəb olub.