ABŞ hökuməti Belarusun kalium istehsalçılarına qarşı tətbiq etdiyi sanksiyaları ləğv etdiyini açıqlamasından sonra 123 məhbus azad edilib. Bu barədə Ukrayna hakimiyyəti məlumat yayıb. Bildirilir ki, Belarus tərəfindən azadlığa buraxılan 100-dən çox şəxs, o cümlədən müxalif siyasi lider Mariya Kolesnikova Ukraynaya göndərilib.
Ukraynanın Müharibə Qrupu üzrə Koordinasiya Mərkəzi açıqlayıb ki, azad edilən 123 nəfərdən 114-ü hazırda Ukrayna ərazisindədir. Mərkəzin məlumatına görə, zəruri tibbi müayinədən və müalicədən sonra, istək bildirən Belarus vətəndaşları Polşa və Litvaya köçürüləcək.
Litvanın paytaxtı Vilnüsdə açıqlama verən, Belarus müxalifət lideri Svetlana Tixanovskayanın sözçüsü bildirib ki, azad edilən şəxslərin Litvaya deyil, “gözlənilmədən” Ukraynaya göndərilməsi qərarı Belarus prezidenti Aleksandr Lukaşenko tərəfindən qəbul edilib.
Bir insan hüquqları təşkilatının verdiyi məlumata görə, azad edilənlər arasında müxalifət lideri Viktor Babariko, Nobel Sülh Mükafatı laureatı Ales Belyatski və müxalif siyasi fəal Mariya Kolesnikova da var.
Qərblə münasibətlərin yaxşılaşdırılması cəhdləri
Belarus prezidenti Aleksandr Lukaşenko dekabrın 12-də ölkənin paytaxtı Minskdə ABŞ nümayəndəsini qəbul edib. Bu görüş A.Lukaşenkonun 1994-cü ildən bəri sərt üsullarla idarə etdiyi Belarusun Qərb ölkələri ilə münasibətlərini yaxşılaşdırmaq istiqamətində atdığı növbəti addım kimi qiymətləndirilir.
Dövlət xəbər agentliyi BELTA və Prezident Administrasiyasının mətbuat xidmətinin məlumatına görə, Aleksandr Lukaşenko ABŞ-ın Belarus üzrə xüsusi elçisi Con Koal ilə görüş keçirib.
Xatırladaq ki, ABŞ rəsmilərinin A.Lukaşenko ilə əvvəlki görüşləri zamanı 50-dən çox siyasi məhbus azad edilərək Litvaya göndərilmişdi.
Belarus ötən ay həmçinin prezident Aleksandr Lukaşenko ilə ABŞ prezidenti Donald Tramp arasında əldə olunmuş razılaşma çərçivəsində 31 Ukrayna vətəndaşını əfv edib.
Qeyd edilir ki, Belarus 2024-cü ilin iyul ayından bu yana Qərblə yaxınlaşma cəhdi kimi qiymətləndirilən proses çərçivəsində ümumilikdə 430-dan çox məhbusu azad edib.
Xatırladaq ki, Rusiyanın yaxın müttəfiqi olan Belarus həm idarəçilik sistemi, həm də Rusiyanın Ukraynaya qarşı həyata keçirdiyi işğal əməliyyatlarına verdiyi lojistik dəstəyə görə Qərb ölkələrinin sanksiyaları və diplomatik təcridi ilə üzləşməkdə davam edir.
