Türkiyənin xarici işlər naziri Hakan Fidan ilə Pakistanın xarici işlər naziri Məhəmməd İshaq Dar arasında aprelin 7-də telefon danışığı baş tutub. Bu barədə məlumat Türkiyə Xarici İşlər Nazirliyi tərəfindən verilib.
Bildirilir ki, H.Fidan və pakistanlı həmkarı M.İ.Dar ABŞ və İsrailin İrana qarşı hücumları ilə başlayan müharibəni dayandırmağa yönəlmiş diplomatik təşəbbüsləri müzakirə ediblər.
Pakistan daha əvvəl Yaxın Şərqdə gərginliyin artdığı münaqişənin dayandırılması üçün diplomatik səylərə “vaxt və imkan” verilməsinin vacibliyini vurğulamışdı.
Pakistanın baş naziri Şahbaz Şərif bildirib ki, Yaxın Şərqdə davam edən müharibənin sülh yolu ilə həlli üçün diplomatik təşəbbüslər ardıcıl şəkildə irəliləyir.
Ağ Ev Pakistanın son təklifinin ABŞ prezidenti Donald Trampa çatdırıldığını açıqlayıb. Sözçü Karolin Levitt isə qeyd edib ki, prezident təkliflə tanışdır və yaxın zamanda cavab veriləcək.
Qeyd edək ki, bu açıqlama Donald Trampın İranla bağlı müəyyən etdiyi, ABŞ-nin şərq vaxtı ilə saat 20:00-da (çərşənbə günü saat 00:00 GMT) başa çatan müddətin bitməsinə saatlar qalmış verilib.
