Türkiyə Respublikasının xarici işlər naziri Hakan Fidan yanvarın 15-də verdiyi açıqlamada Türkiyənin İrana yönəlik istənilən hərbi müdaxiləyə qarşı olduğunu vurğulayıb. Nazir H.Fidan rəsmi Tehranın öz daxili problemlərini özü həll etməli olduğunu bildirib. H.Fidan bu fikirləri İstanbulda jurnalistlərlə keçirdiyi görüş zamanı səsləndirib.
İranlı həmkarlarını regional ölkələrlə olan problemləri həll etməyə çağırdığını bildirən H.Fidan deyib: “İqtisadi çətinliklərə səbəb olan bəzi struktur problemlərin aradan qaldırıla bilməsi üçün qlobal nüvə məsələsi ilə bağlı problemlərini heç bir fürsəti qaçırmadan diplomatiya yolu ilə həll etməlidir.”
Məsələnin beynəlxalq müstəvidə olduğunu qeyd edən H.Fidan əlavə edib ki, Tehran rəhbərliyi bəzi siyasi məqamlar səbəbilə sanksiyalara məruz qalır. Beynəlxalq sanksiyalar altında olan bir ölkədə isə iqtisadi vəziyyətin müəyyən qədər aşağı olması təbii haldır.
“İran böyük əhaliyə və dinamik cəmiyyətə malikdir. Yaşamaq və ictimai həyata qatılmaq istəyi çox güclüdür, yetişmiş insan potensialı var. Belə bir cəmiyyəti müəyyən imkanlardan məhrum etdikdə bu cür problemlər ortaya çıxır. Burada qarışdırılan məqam ondan ibarətdir ki, insanların iqtisadi və digər çətinliklər səbəbilə yaşadığı sıxıntılar rejimə qarşı ideoloji üsyan kimi görünə bilər; əslində isə bu tam olaraq belə deyil. Çünki məsələyə yaxından baxıldıqda aydın olur ki, xaricdəki bəzi İran əleyhdarı ölkələrin iştahını artıracaq səviyyədə rejimə qarşı bir düşmənçilik vəziyyəti yaranmayıb. Lakin mövcud siyasətin yaratdığı iqtisadi çətinliklər və bu çətinliklərin yüngülləşdirilə bilməməsi ciddi problemlərə yol açır. Ancaq biz hər bir halda hər hansı bir xarici müdaxilə görmək istəmirik”, - deyə nazir H.Fidan əlavə edib.
