"Anadolu" Agentliyinin xəbərinə görə, Türkiyənin milli müdafiə naziri Yaşar Gülər dörd ölkənin iştirakı ilə təşkil olunacaq müdafiə sənayesi sahəsində əməkdaşlıq memorandumunun imzalama mərasimində iştirak etmək üçün Qətərə gedəcək.
Nazir Y. Gülərin oktyabrın 21-də günortadan sonra Qətərə səfər edəcəyi gözlənilir.
Türkiyə, Qətər, Pakistan və İndoneziya anlaşma memorandumunu oktyabrın 22-də imzalayacaqlar.
Həmçinin Qətərin müdafiə məsələləri üzrə dövlət naziri Saud bin Əbdülrəhman bin Həsən Al Tani oktyabrın 19-da Dohadakı Qlobal Təhlükəsizlik Forumunda verdiyi açıqlamada Qətərin yaxın vaxtlarda yerli müdafiə istehsalı mərkəzi yaratmaq planlarını elan edəcəyini bildirib.
Al Tani Qətərin yerli müdafiə potensialını inkişaf etdirmək və müdafiə şirkətlərində investisiya imkanlarını araşdırmaq üçün ABŞ, Böyük Britaniya və Fransa da daxil olmaqla regional və beynəlxalq tərəfdaşlarla işlədiyini qeyd edib.
Al Tani, həmçinin Qətərin ballistik raketlərə, pilotsuz uçuş aparatlarına və kiberhücumlara qarşı imkanlarını gücləndirmək üçün yaxın vaxtlarda yeni tərəfdaşlıq elan edəcəyini bildirib, lakin ətraflı məlumat verməyib.
Bu açıqlamalar Qətərin energetika sektoruna və dəniz ticarətinə təsir edən ABŞ-İsrail-İran müharibəsi zamanı verilib.
Qətər münaqişələrin başlamasından qısa müddət sonra Ras-Laffandakı əsas mayeləşdirilmiş təbii qaz kompleksinin böyük hissəsini bağlamış, strateji Hörmüz boğazından gəmi keçidinə tətbiq edilən məhdudiyyətlər isə qlobal ticarəti əngəlləmişdi.
Türkiyə və Qətər son illərdə strateji tərəfdaşlıqlarını gücləndirərək müdafiə, təhlükəsizlik, ticarət və sərmayə sahələrində əməkdaşlığı genişləndiriblər. Dohada ortaq hərbi komandanlıq saxlayan iki ölkə regional məsələlərdə koordinasiya həyata keçirir.
Türkiyə və Qətər 2025-ci ilin oktyabrında ikili əlaqələri dərinləşdirməyi hədəfləyən daha geniş sazişlərin bir hissəsi olaraq müdafiə sənayesi sahəsində əməkdaşlığa dair anlaşma memorandumu imzalayıblar.
