Türkiyə prezidenti Rəcəb Tayyib Ərdoğan İstanbulda 23 mayda keçirilən Beynəlxalq Ailə Forumunda çıxışı zamanı 2026-2035-ci illəri Ailə və Əhali Onilliyi elan etdi.
Ərdoğan fərdi rahatlığı ailə və sosial bağlardan üstün tutan müasir həyat tərzini tənqid edərək dedi: “Modernləşməni ailəsizlik və təcrid üzərində qurmaq düşüncəsi nə fərdlərə, nə də cəmiyyətə barış gətirə bilər. Bu həyat tərzi, xüsusilə gənclərdən başlayaraq cəmiyyətimizin toxumasına sürətlə nüfuz edir.
Ənənəvi ailə quruluşunun qorunması vacibdir.
Qlobal bazar aktyorları güclü ailə həmrəyliyini dəstəkləmir.
Ailəsindən uzaqlaşmış və milli kimliyi zəifləmiş bir insan nə azad ola bilər, nə də realist.
Dünyanın hər yerində ailə institutunun aşınması adamları populyar mədəniyyətin istehlakçılarına çevirib.
LGBT-yə sərt ifadələr işlədən sənətçilər, biznesmenlər, siyasətçilər və alimlər bu bəlaya qarşı çıxdıqları üçün sosial linçlərə məruz qalır. Amma LGBT pozğunluğuna qarşı mübarizə həm də azadlıq, ləyaqət və bəşəriyyətin gələcəyi uğrunda mübarizədir.
Türkiyədə doğum nisbəti kəskin şəkildə azalıb. Tariximizdə ilk dəfə doğum nisbətimiz 1,48 faizə düşüb. Bu, fəlakətdir. Çünki göstərici kritik hədd olan 2,1 faizdən də aşağıdır.”
Türkiyənin birinci xanımı Əminə Ərdoğan İstanbulda keçirilən Beynəlxalq Ailə Forumunun bağlanış mərasimində iştirak edib və bir neçə sərgi stendini gəzib. O, Ailə və Sosial Xidmətlər Nazirliyi tərəfindən hazırlanmış “Bütün xoşbəxt ailələr bir-birinə bənzəyir” adlı interaktiv sərgiyə də baş çəkib və nümayiş etdirilən məhsullarla maraqlanıb.
“Qlobal çağırışlar qarşısında ailənin qorunması və möhkəmləndirilməsi” başlığı altında təşkil olunan iki günlük tədbir siyasətçiləri, ekspertləri və QHT nümayəndələrini bir araya gətirərək ailənin dəyişən rolu və müasir cəmiyyətdə üzləşdiyi təhdidləri müzakirə ediblər.
Tədbir çərçivəsində nazirlər sessiyası və dörd panel müzakirəsi keçirilib: “Yüksək mənfəət: qlobal çağırışlarda fərdlərə, ailələrə və cəmiyyətə dəyər,” “Uydurma ilə reallıq arasında: mədəniyyət, incəsənət və mediada ailə,” “Ekranlar dövründə ailə olmaq” və “Əhali artımı mifləri: qlobal gündəlik əhalinin azalmasına necə təsir etdi”.
