Xarici işlər naziri Radoslav Şikorski Trampın Rusiya pilotsuz təyyarələrinin Polşanın hava məkanını pozması ilə bağlı iddiasının “səhv” olduğu barədəki açıqlamasını rədd edərək, 7 saat ərzində 19 pilotsuz təyyarə pozuntusunun təsadüf ola bilməyəcəyini bildirib.

Polşanın xarici işlər naziri Radoslav Sikorski qeyd edib ki, keçən həftə Polşanın hava məkanını pozan Rusiyaya aid pilotsuz təyyarələr, tammiqyaslı müharibəni hədəfləməsələr belə, NATO-nun cavabını sınamaq məqsədi daşıyır.

Radoslav Sikorski İngiltərədə dərc olunan "The Guardian" qəzetinə deyib: "Maraqlıdır ki, onların hamısı uğursuz oldu; bu, mənə elə gəlir ki, Rusiya müharibəyə başlamadan bizi sınamağa çalışırdı".

Təxminən 19 pilotsuz təyyarədən yalnız üç və ya dördünün vurulması ilə bağlı tənqidləri rədd edən Şikorski, "Pilotsuz təyyarələr hədəflərinə çata bilməyib və maddi ziyana səbəb olub, heç kim xəsarət almayıb. Bu, Ukraynada baş versəydi, Ukrayna standartları ilə müqayisədə 100 faiz uğur sayılardı" deyib.

Sikorski əlavə edib ki, itkilər olarsa, Varşavanın cavabı "daha sərt" olacaq.

Səhv deyil

Radoslav Sikorski Trampın “Rusiyanın pozuntuları xəta ola bilər” ifadəsini qəti şəkildə rədd edib.

Şikorski "Bir və ya iki dronun səhv istiqamətləndirilməsinə inana bilərsiniz, amma bir gecədə yeddi saat ərzində 19 səhv? Bağışlayın, buna inanmıram" deyib.

Rusiya tərəfi Polşanı qəsdən hədəfə alması ilə bağlı iddiaları təkzib edib.

Radoslav Sikorski "X" platformasındakı paylaşımda Moskvanı ziddiyyətli bəyanatlarla ittiham edərək, "Rusiya hökuməti pilotsuz təyyarələrin təsadüfən Polşa hava məkanını pozduğunu iddia edir, Rusiyanın BMT-dəki daimi nümayəndəsi isə Rusiya pilotsuz təyyarələrinin fiziki olaraq Polşaya çata bilməyəcəyini iddia edir. Hansı rus yalanına inanmalıyıq?" deyib.

NATO sentyabrın 12-də verdiyi açıqlamada bildirib ki, şərq cinahına daha çox döyüş təyyarəsi yerləşdirməklə gələcək dron hücumlarına qarşı müdafiəsini gücləndirəcək.