Kaliforniya ABŞ prezidenti Donald Trampı tarif tətbiqi səbəbindən məhkəməyə verən ilk ABŞ ştatı olub.
"Bu gün Kaliforniya ştatı adından Tramp administrasiyasını məhkəməyə verdiyimizi elan edirəm. Kaliforniya, ölkəmizin ən böyük istehsal ştatıdır və qlobal miqyasda ən böyük ticarət tərəfdaşlarından biridir. Tramp administrasiyasının müasir Amerika tarixindəki ən böyük vergi artımını tətbiq etmək üçün irəli sürdüyü birtərəfli səlahiyyətlə bağlı heç bir ştat Kaliforniya qədər təsirlənməyib. Bu, ölkəmizin tarixindəki ən böyük avtoqoldur və müasir Amerika tarixindəki ən özünü məhv edən addımlardan biridir," - deyə Kaliforniya qubernatoru Qavin Nevsom bildirib.
40 milyon əhalisi olan və ABŞ-ın ÜDM-nin 14 faizini təşkil edən böyük iqtisadiyyatı ilə Kaliforniya, son dəyişikliklərin proqnozlaşdırılan iqtisadi zərərinin ağır yükünü daşıyacaq.
Nevsom administrasiyası xəbərdarlıq edib ki, əgər Trampın tarif siyasəti beynəlxalq ticarəti azaldarsa, Kaliforniya milyardlarla dollar gəlir itirə bilər.
"ABŞ Konstitusiyası Konqresə tariflər tətbiq etmək səlahiyyəti verir və Trampın yeni tariflər üçün səlahiyyətli kimi göstərdiyi IEEPA, prezidentə Amerika Birləşmiş Ştatlara daxil olan bütün mallara özbaşına vergi tətbiq etmək səlahiyyətini vermir. Prezident Trampın yeni tarif sərəncamı artıq iqtisadiyyata dağıdıcı təsir göstərib, səhm və istiqraz bazarlarında xaos yaradıb, yüz milyardlarla dolları bir neçə saat ərzində bazar dəyərindən silib, heç bir xəbərdarlıq və ya lazımi prosedur olmadan investisiyaları azaldıb", – deyə məhkəmə iddiasında vurğulanıb.
İddiada qeyd edilir ki, ABŞ ştatları arasında ən böyük idxalçı və dünyanın beşinci ən böyük iqtisadiyyatı olan Kaliforniya tariflərin xərclərinin qeyri-mütənasib yükünü daşıyır.
Ağ Evin sözçüsü Kuş Desai çərşənbə günü bildirib ki, Kaliforniya qubernatoru Gavin Nevsom Trampın tariflərini əngəlləməyə çalışmaq əvəzinə, öz ştatında cinayət, evsizlik və yüksək qiymətlərlə mübarizə aparmalıdır.
Desai həmçinin deyib: "Trump administrasiyası Amerika sənayelərini məhv edən və işçilərimizi tariflərdən tutmuş danışıqlara qədər istifadə edə biləcəyimiz hər vasitə ilə geridə qoyan bu milli fövqəladə vəziyyətin həllinə sadiqdir".
Tramp administrasiyası artıq üç analoji məhkəmə iddiası ilə üzləşib. Bunlardan biri Nyu-Yorkda yerləşən Beynəlxalq Ticarət Məhkəməsindəki Liberty Justice Center biznes vəkillik qrupu tərəfindən bütün tarifləri bloklamaq istəyən iddiadır; başqa biri kiçik bir biznes sahibi tərəfindən Florida federal məhkəməsində Çinə tətbiq edilən tarifləri bloklamaq üçün verilən iddiadır; üçüncüsü isə Kanadanın Alberta və Montana əyalətlərində yayılmış yerli Amerika qəbiləsi olan Blackfeet Nation üzvləri tərəfindən Montanada təqdim edilmiş və Trampın Kanadaya tətbiq etdiyi tariflərə etiraz edən iddiadır.
