Ağ Evin sözçüsü Stiven Çunq Nobel Sülh Mükafatının Venesuela müxalifətinin tanınmış siması Mariya Korina Maçadoya verilməsini kəskin şəkildə tənqid edib. S.Çunq “X” platformasında etdiyi paylaşımda yazıb:
“ABŞ prezidenti Donald Tramp sülh sazişləri imzalamağa, müharibələri bitirməyə və insan həyatını xilas etməyə davam edəcək. O, humanist bir ürəyə malikdir və iradəsinin gücü ilə dağları yerindən oynadacaq qədər qüvvətli bir liderdir. Nobel Komitəsi sülhü deyil, siyasəti üstün tutduqlarını bir daha sübut etdi.”
Xəbər verildiyi kimi, Norveç Nobel Komitəsi 2025-ci il üçün Nobel mükafatını Venesueladan olan Mariya Korina Maçadoya təqdim edərək onu “azadlığın cəsur müdafiəçilərindən biri” adlandırıb və “Venesuela xalqının demokratik hüquqlarının müdafiəsi uğrunda yorulmaz mübarizəsi”nə görə təltif edib.
M. Korina Maçado isə sosial şəbəkə “X”da paylaşım edərək bunları yazıb: “Biz qələbənin astanasındayıq və bu gün hər zamankindən daha çox prezident D.Trampa, ABŞ xalqına, Latın Amerikası xalqlarına və dünyanın demokratik millətlərinə azadlıq və demokratiyanın qazanılması uğrunda əsas müttəfiqlərimiz kimi güvənirik.”
“Ölkəmizə böyük təhqirdir”
Amerika prezidenti D.Tramp uzun müddətdirki Nobel mükafatı üçün kampaniya aparırdı. O, bu həftə İsrailin Qəzzadaki soyqırımını dayandırmaq məqsədi daşıyan atəşkəs və girov mübadiləsi razılaşmasını elan etmişdi.
D.Tramp Nobel qərarı barədə hələlik birbaşa açıqlama verməyib. Lakin o, oktyabrın 10-da səhər “Truth Social” hesabında İsrailin soyqırımını dayandıran Qəzza sülh razılaşmasını təbrik edən dəstəkçilərinin üç videosunu paylaşıb.
Xatırladaq ki, ABŞ-nin sabiq dörd prezidenti bu mükafata layiq görülmüşdü: Barak Obama 2009-cu ildə, Cimmi Karter 2002-ci ildə, Vudro Vilson 1919-cu ildə, Teodor Ruzvelt isə 1906-cı ildə Nobel Sülh Mükafatına layiq görülüblər. Onlardan yalnız C.Karter mükafatı vəzifədən getdikdən sonra qazanmışdı. B.Obama isə prezidentlik səlahiyyətlərinə başlamasından cəmi səkkiz ay sonra Nobel Sülh Mükafatına layiq görülmüşdü.
Qeyd edək ki, Nobel Sülh Mükafatını uzun illərdir arzu edən D.Tramp da ikinci prezidentlik dövrünün səkkizinci ayındadır. Hətta, BMT-dəki son çıxışlarından birində D.Tramp dəfələrlə “imkansız görünən yeddi müharibəni dayandırdığını” bəyan edib.
Ötən həftə isə Qəzza üçün hazırladığı 20 maddəlik sülh planının uğurlu olması halında, “səkkiz ayda səkkiz müharibənin sona çatacağını” bildirərək deyib: “Bu, olduqca yaxşıdır. Bunu heç kim etməyib. Nobel Mükafatını alacaqsınızmı? Əlbəttə ki, yox.” – deyə o, istehzalı şəkildə Komitəyə eyham vurmuşdu.
Sentyabrın 30-da Virciniyada hərbi liderlərlə görüşündə də D.Tramp Nobel Komitəsini tənqid edərək demişdi: “Onlar heç bir iş görməmiş birinə mükafat verəcəklər. Amma bu, ölkəmizə böyük bir təhqir olacaq. Bunu açıq şəkildə söyləyirəm.”
