Fransa quş qripi ilə bağlı xəbərdarlıq səviyyəsini “orta”dan “yüksək” səviyyəyə qaldıraraq, Avropada xəstəliyin yenidən yayılması səbəbindən ölkədəki quşçuluq təsərrüfatlarında quşların qapalı yerlərdə saxlanması barədə göstəriş verib.

“Yüksək patogen quş qripi” — adətən quş qripi kimi tanınan və köçəri quşlar tərəfindən yayılan mövsümi xəstəlikdir. Son illərdə bu epidemiya dünya üzrə on milyonlarla quşun məhvinə səbəb olub, həmçinin insan yoluxması ilə bağlı narahatlıqları artırır.

Kənd Təsərrüfatı Nazirliyinin rəsmi qəzetdə dərc etdiyi bəyanatda deyilir:
“Bu fərman Avropada, o cümlədən Fransada köçəri vəhşi quşlarda yoluxma faktları aşkar edildikdən və quşçuluq təsərrüfatlarında bir neçə epidemiyanın təsdiqindən sonra verilib’’.

Nazirliyin müvafiq əmrinə əsasən, indiyədək quşçuluq təsərrüfatlarında 2, kiçik ailə təsərrüfatlarında isə 3 quş qripi epidemiyası aşkar edilib. İlk hadisə oktyabrın ortalarında Fransanın şimalındakı qırqovul və kəklik fermasında qeydə alınıb.

Xəbərdarlıq səviyyəsindəki dəyişiklik oktyabrın 22-də qüvvəyə minəcək.

Mövsümi qiymətləndirmədə risk səviyyəsinin yüksəldilməsi əvvəlki illərlə müqayisədə daha tez həyata keçirilir.