İranın ali dini lideri Ayətullah Əli Xameneinin İsrail ilə ABŞ-nin həyata keçirdiyi birgə əməliyyatı nəticəsində öldürülməsi xəbəri ölkə daxilində genişmiqyaslı etirazlara səbəb olub.

Dövlət televiziyası səhər saatlarında yaydığı rəsmi məlumatda İslam İnqilabı liderinin şəhid olduğunu təsdiqləyib.

Bu hadisədən sonra hökumət tərəfindən 40 günlük milli matəm və yeddi günlük rəsmi tətil elan edilib. Hadisə Yaxın Şərqdə gərginliyi yüksək həddə çatdırıb.

Ölüm xəbərinin yayılması ilə İranın bir çox şəhərində on minlərlə insan küçələrə axışaraq şəhər mərkəzlərində toplaşıb.

Paytaxt Tehranda yüzlərlə nümayişçi İnqilab Meydanına toplaşaraq Xameneinin şəkillərini daşıyaraq, ABŞ və İsrail əleyhinə şüarlar səsləndiriblər.

Müqəddəs Qum şəhərində Həzrəti Məsumə ziyarətgahına toplaşan insanlar hücumlara etirazını bildirib, Məşhəddə isə matəm rəmzi olaraq İmam Rza ziyarətgahının günbəzinə qara bayraq asılıb.

Rəsmilər fevralın 28-də həyata keçirilən hücum zamanı Xameneinin Tehrandakı ofisinin hədəf aldığını açıqlayıblar.

Dövlət mediası liderin yeraltı sığınacaqlarda gizləndiyi barədə iddiaları təkzib edərək, onun hücum anında "xidmətdə və xalq arasında" olduğunu xüsusi vurğulayıb. Məlumatlara görə, zərbələr nəticəsində ali liderlə yanaşı, onun qızı, kürəkəni, nəvəsi və gəlini də həyatını itirib.

İran Qırmızı Aypara Cəmiyyətinin son hesabatına əsasən, hücumlar zamanı mülki vətəndaşlar da daxil olmaqla ümumilikdə 201 nəfər həlak olub, 747 nəfər isə xəsarətlər alıb.