ABŞ əhalisinin təxminən yarısı — 161 milyon insan "son dərəcə təhlükəli istilik dalğası” ilə üzləşir. Şərq sahilində, o cümlədən Nyu-York, Filadelfiya və Vaşinqtonda temperatur 38°C-dən yuxarı qalxıb.

  ABŞ Milli Hava Xidməti (NWS) xəbərdarlıq edib ki, istilik və rütubətin birləşməsi istilik indeksini "hiss edilən temperatur”u Şimal-Şərqin bəzi bölgələrində 43°C-yə qədər yüksəldə bilər.

  Nyu-York şəhərində temperatur 37°C-ə çatıb və bu, 2012-ci ildən bəri şəhərdə ən isti gün olub. Yaxınlıqdakı Nyuark, Nyu-Cersidə 39,4°C, Filadelfiyada isə 38°C qeydə alınıb.

  NWS bildirib: "Bu cür istilik son dərəcə təhlükəlidir və əhali tərəfindən ciddi qəbul edilməlidir. Sakinlər ağır fiziki fəaliyyətdən çəkinməli və kifayət qədər su içməlidir”.

  İstilik Nyu-Yorkun Bronx bölgəsində 34.000-dən çox evə təsir edən elektrik kəsilməsinə səbəb olub. Enerji təchizatçısı Con Edison müştəriləri elektrik istifadəsini azaltmağa çağırıb.

  Bir neçə şəhərdə ictimai məkanlar günorta saatlarında demək olar ki, boş qalıb.

  “Amtrak” qatar şirkəti ekstremal temperaturla əlaqədar Şərq sahili marşrutlarında sürəti azaltdığını və gecikmələr barədə xəbərdarlıq etdiyini açıqlayıb.

İstilik qübbəsi

  Yüksək temperatur "istilik qübbəsi" adlanan hava örtüyünün bir hissəsi  — isti havanı səthə yaxın saxlayan və istilik səviyyəsini bir neçə gün ərzində artıran yüksək təzyiq sistemidir. Meteoroloqlar və iqlim mütəxəssisləri belə hadisələrin qlobal istiləşmə səbəbindən tezliyi, müddəti və intensivliyi artırdığını bildirir.

  “2024-cü il qlobal miqyasda ən isti il” olaraq qeydə alınıb. 2025-ci ilin isə buna yaxın olacağı proqnozlaşdırılır.

  Ekstremal istilik ABŞ-da hava ilə bağlı ölümlərin əsas səbəbidir və bu baxımdan qasırğa, daşqın və fırtınaları keçir.