Yanvarın 4-də Karakasda devrilmiş prezident Nikolas Maduronun təxminən 2000 tərəfdarı etiraz aksiyası keçirərək ABŞ qüvvələri tərəfindən saxlanılan Maduro və həyat yoldaşının azad edilməsini tələb ediblər. Nyu-Yorkdakı həbsxanaya aparılan sabiq liderin tərəfdarları nümayiş zamanı üzərində ‘‘Prezidentimizi azad edin’’ və ‘‘Venesuela müstəmləkə deyil’’ yazılmış plakatlar qaldırıblar. Aksiyada Maduroya sadiq hərbi qruplar da iştirak ediblər. Yanvarın 5-də məhkəmə qarşısına çıxarılması planlaşdırılan Maduronun saxlanılması prosesi ilə bağlı xəyanət iddiaları da gündəmə gəlib. Etirazçılar və Maduronun oğlu Nikolas Maduro Quera prezidentin ən yaxın çevrəsindəki casusların xəyanəti nəticəsində ABŞ xüsusi təyinatlılarının onu ölkənin ən böyük hərbi bazalarından birində ələ keçirdiyini bildiriblər.

ABŞ-ın hücumları nəticəsində həyatını itirənlərin dəqiq sayı hələ rəsmi olaraq açıqlanmayıb. Müdafiə naziri Vladimir Padrino Lopes hücumlar zamanı Maduronun təhlükəsizlik qrupunun, habelə hərbçilərin və mülki şəxslərin öldürüldüyünü qeyd edib. Bir qrup həkim AFP-yə açıqlamasında hadisələr zamanı təxminən 70 nəfərin həlak olduğunu, 90 nəfərin isə yaralandığını bildirib. Hazırda Venesuela xəstəxanaları ölənlərin və yaralananların ümumi sayı barədə açıqlama vermir.