Səhiyyə mənbələrinin AFP-yə verdiyi məlumata görə, Çevik Dəstək Qüvvələrinin (RSF) Sudanın paytaxtı Omdurmanda törətdiyi hücum nəticəsində ikisi uşaq olmaqla üç mülki vətəndaş həlak olub. Şahidlər, ordunun nəzarəti altında olan yaşayış məhəllələrinin top mərmiləri ilə hədəf alındığını bildiriblər. Ordu, bu yaxınlarda paytaxt Xartumun mərkəzi hökumət dairəsinin böyük bir hissəsini Çevik Dəstək Qüvvələrindən geri almışdı.

Al Nao xəstəxanasının rəsmisinin yaydığı məlumatda hücum nəticəsində iki uşaq və bir qadının həlak olduğu, 8 nəfərin isə yaralandığı vurğulanıb. Qeyd edək ki, bu xəstəxana şəhərdə hələ də fəaliyyət göstərən azsaylı səhiyyə ocaqlarından biridir.

Xatırladaq ki, 2023-cü ilin aprel ayından etibarən Sudan ordusu ilə Çevik Dəstək Qüvvələri arasında qarşıdurmalar davam edir. Bu münaqişələr on minlərlə insanın ölümünə, 12 milyondan çox insanın evlərini tərk etməsinə səbəb olub və dünyanın ən böyük aclıq və köçkünlük böhranlarından birinə yol açıb.

Çevik Dəstək Qüvvələri hələ də paytaxtdadır

Ordu və müttəfiq qruplar Çevik Dəstək Qüvvələrini Xartumun mərkəzi inzibati və maliyyə rayonundan çıxarmaq üçün cümə günü əməliyyata start verib.

Ordu şənbə günü Çevik Dəstək Qüvvələri tərəfindən ələ keçirilən mərkəzi bank, dövlət kəşfiyyat mərkəzi və milli muzey kimi strateji dövlət qurumlarına nəzarəti bərpa etdiyini açıqlayıb.

Çevik Dəstək Qüvvələri hava limanı ətrafında, o cümlədən mərkəzi Xartumda, paytaxtın cənub və qərb bölgələrində mövcudluğunu davam etdirir və Omdurmanın qərbindəki mövqelərindən mütəmadi olaraq mülki ərazilərə hücumlar təşkil edir.

Çevik Dəstək Qüvvələrinin fevral ayında Omdurmandakı bazara təşkil etdiyi hücum nəticəsində 50-dən çox adam həlak olmuşdu.

Ordu paytaxtda irəliləyiş əldə etsə də, Afrikanın üçüncü ən böyük ölkəsi faktiki olaraq ikiyə bölünüb. Çevik Dəstək Qüvvələri demək olar ki, qərbi Darfur bölgəsinə və cənubun bir hissəsinə, ordu isə şərq və şimala nəzarət edir.