Meteoroloqların məlumatına görə, İslandiyanın cənub-qərbində yerləşən Reykyanes yarımadasında daha bir vulkan püskürüb. Bu, 2023-cü ilin sonundan bəri bölgədə qeydə alınan doqquzuncu vulkanik hadisədir.
İslandiya Meteorologiya Xidməti püskürmənin yerli vaxtla səhər saat 04:00 radələrində başladığını açıqlayıb.
İslandiyanın RUV telekanalının məlumatına görə, yaxınlıqdakı Grindavik balıqçı kəndi və məşhur turizm mərkəzi olan Mavi Laqun təhlükəsizlik məqsədilə boşaldılıb. Qeyd edək ki, bu bölgədə sonuncu püskürmə bu ilin aprel ayında baş vermişdi.
Reykyanes yarımadasında ilk vulkan püskürməsi 2023-cü ilin sonlarında qeydə alınıb. Həmin vaxtdan bəri Grindavikdə yaşayan 4000 nəfərin əksəriyyəti evakuasiya edilib. Bölgədəki evlərin demək olar ki, hamısı dövlət tərəfindən alınıb və əhalinin böyük hissəsi ərazidən köçüb.
Reykyanesdəki vulkanlar 2021-ci ilin martında artan seysmik aktivlikdən əvvəl təxminən 800 il ərzində fəal olmayıb. Lakin vulkanoloqlar son illərdə bölgədə yeni bir vulkanik dövrün başlandığı barədə xəbərdarlıq edirdilər.
RUV bildirib ki, son püskürmə beynəlxalq hava uçuşlarına təsir göstərməyib.
Xatırladaq ki, 2010-cu ildə İslandiyanın digər bölgəsində baş verən vulkan püskürməsi Avropa hava məkanının bağlanmasına səbəb olmuşdu.
Avropanın ən aktiv vulkanik sisteminə malik olan İslandiyada ümumilikdə 33 aktiv vulkan mövcuddur. Ölkə Avrasiya və Şimali Amerika tektonik plitələrini ayıran Orta Atlantik silsiləsində yerləşdiyindən, bölgədə tez-tez zəlzələlər və vulkan püskürmələri baş verir.
