Türkiyə Prezidenti Rəcəb Tayyib Ərdoğan, İstanbul danışıqlarında əldə olunan irəliləyişin Moskva və Kiyev arasında davamlı sülh üçün bir fürsət olduğunu bildirib və Rusiya ilə Ukraynanı bu fürsəti qaçırmamağa çağırıb.
Dövlət başçısı “Biz həm Rusiya, həm də Ukrayna ilə əlaqədəyik. Əldə etdiyimiz irəliləyişi davamlı sülh üçün bir fürsət kimi görürük” deyib.
Türkiyə prezidenti danışıqların İstanbulda yenidən başlanacağına ümid etdiyini də ifadə edərək deyib ki, Rusiya xarici işlər naziri Lavrovun verdiyi bəyanatı ciddiyyətsiz qəbul etmək olmaz. Bu, sülh üçün ümidimizi daha da artırıb.
Lavrov bildirib ki, Rusiya və Ukrayna danışıqların ikinci raundunun İstanbulda keçirilməsini istəyirlər. Bu, İstanbul sülh prosesinin yenidən başlamasına imkan verəcək.
Rusiya xarici işlər naziri mayın 28-də ABŞ Dövlət katibi Marko Rubio ilə telefon danışığı apararaq, İstanbulda mümkün Rusiya-Ukrayna sülh danışıqlarını müzakirə edib.
Lavrov daha əvvəl Rusiyanın Ukrayna ilə ikinci raund danışıqlarını 2 iyun tarixində İstanbulda keçirməyi təklif etdiyini bildirib.
Ukrayna hələlik Rusiyanın təklifinə cavab verməyib.
Digər tərəfdən, Türkiyənin xarici işlər naziri Hakan Fidan mayın 26-da Rusiyanın paytaxtı Moskvada Rusiya pezidenti Vladimir Putinlə görüşüb və Ukraynaya yola düşüb.
Fidanın Ukrayna prezidenti Volodimir Zelenski, Baş nazir Denis Şmıqal, müdafiə naziri Rüstəm Umerov, həmçinin Ukraynanın xarici işlər naziri Andriy Sibiha və Prezident Aparatının rəhbəri Andriy Yermak ilə görüşməsi planlaşdırılır.
Görüşlərdə ikitərəfli məsələlər, eləcə də Ukraynada həll yolu ilə bağlı Rusiya ilə aparılan danışıqları əhatə edən regional məsələlərin müzakirə ediləcəyi gözlənilir.
16 may tarixində Rusiya və Ukrayna İstanbulda üç il ərzində ilk birbaşa danışıqlarını keçirib və tərəflər ümumilikdə hər iki tərəfdən 1000 nəfəri əhatə edən genişmiqyaslı əsir mübadiləsinə razılaşıblar.
Türkiyənin vasitəçiliyi ilə keçirilən danışıqlar zamanı hər iki tərəf atəşkəs üçün danışıqları davam etdirmək barədə razılığa gəlib.
Prezident Ərdoğan Azərbaycana səfərindən qayıdarkən, Türkiyə və Azərbaycanın müdafiə, enerji, kənd təsərrüfatı və heyvandarlıq sahələrində əməkdaşlığı inkişaf etdirdiyini də diqqət çəkib.
Ərdoğan həmçinin, Azərbaycan və Ermənistan arasında sülhə nail olmaq üçün atılan addımları alqışlayıb və Bakını bölgədə sülhün memarı kimi tərifləyib.
