ABŞ prezidenti Donald Tramp Ukraynaya "Patriot" hava hücumundan müdafiə sistemlərinin göndəriləcəyini açıqlayıb.
Donlad Tramp bu barədə iyulun 13-də Merilend ştatındakı Endryus Hərbi Hava Bazasında jurnalistlərə verdiyi açıqlamada bildirib.
Rusiya prezidenti Vladimir Putinin mövqeyini tənqid edən Donald Tramp deyib: “Putin çoxlarını təəccübləndirib. Yaxşı danışır, amma axşam hamını bombalayır. Amma bir problem var: bunu bəyənmirəm.”
ABŞ prezidenti həmçinin NATO-nun baş katibi Mark Rutte ilə görüşəcəyini deyib. Yeri gəlmişkən qeyd edək ki, Mark Rutte iyulun 14-də Vaşinqtona səfər edəcək və burada dövlət katibi Marko Rubio, müdafiə naziri Pit Heqset, eləcə də Konqres üzvləri ilə bir sıra görüşlər keçirəcək.
İyulun 14-də Rusiyaya qarşı sanksiyaların elan olunub-olunmayacağı ilə bağlı sualı cavablandıran Donald Tramp deyib. “Sabah nə olacağını görəcəyik.”
Qeyd edək ki, senatorlar Lindsi Qraham və Riçard Blumental aprelin 1-də Rusiyadan neft, qaz, uran və digər məhsullar idxal edən ölkələrə qarşı 500 faiz gömrük rüsumu tətbiq olunmasını nəzərdə tutan 2025-ci il tarixli Rusiya Sanksiya Aktını təqdim ediblər.
Xatırladaq ki, Donald Tramp ötən cümə axşamı Rusiya ilə bağlı bazar ertəsi “böyük açıqlama” verəcəyini desə də, hələlik bu barədə ətraflı məlumat paylaşmayıb.
