İran Parlamentinin sədri Məhəmməd Baqir Qalibaf ABŞ-nin ölkəsinə qarşı həyata keçirdiyi son hərbi əməliyyatlara sərt reaksiya verərək strateji əhəmiyyətə malik Hörmüz boğazının statusu ilə bağlı Vaşinqtona ciddi xəbərdarlıq edib. Rəsmi "X" səhifəsində paylaşım edən Qalibaf ABŞ-nin zorakılıq siyasətinin artıq cəzasız qalmayacağını hələ də dərk etmədiyini vurğulayıb.

Ağ Evə müraciət edən parlament sədri deyib: "Bizə hücum etsəniz, siz də hədəf alınacaqsınız". Vaşinqtonu Hörmüz boğazı üzərindən Tehrana təzyiq göstərmək cəhdlərindən çəkinməyə çağıran Qalibaf sözügedən su yolunun ABŞ-nin təhdidləri ilə deyil, İranın müəyyən etdiyi şərtlər və razılaşmalar çərçivəsində açıq qalacağını bildirib. O, ABŞ-nin bölgədəki hərəkətlərini "boş yerə mübarizə" adlandırıb.

İran İnqilabı Keşikçiləri Korpusu da ABŞ-nin hərbi hücumlarının təkrarlanacağı təqdirdə daha genişmiqyaslı qisas tədbirlərinin görüləcəyi barədə xəbərdarlıq edib. İran İnqilabı Keşikçiləri Korpusu rəsmi Vaşinqtonun yeni hərbi əməliyyatlara əl atacağı təqdirdə İranın cavab zərbələrinin təkcə mövcud hədəflərlə məhdudlaşmayacağını, regiondakı digər ABŞ hərbi bazalarını da əhatə edəcəyini xüsusi vurğulayıb.